Soi soskular ia suk ka NSCN(IM) bad u myntri rangbahduh

New Delhi, 3 Nailar: 
Ka sorkar pdeng bad ka National Socialist Council of Nagaland-IM, ha ka lah sngi u Blei, ka la ia soi ia suk da ka jingiakular ban wanrah ia ka shongsuk shongsain ha ka jylla Nagaland kaba la ia um snam da ki phew snem.
La ia soi ia suk ha ryngkat ka jingdonlang u Myntri Rangbah Duh ka ri u Narendra Modi, U Rajnath Singh myntri kam poh iing, ha kaba ki la pynpaw katei ka dei ka sngi sah kynmaw ban pynkut ia ka jing ia um snam ha ka ri. U Modi uba la kren ruh ia ka jingangnud jong u ban kyntiew ia ka thain shatei Lam mihngi, u la ong ba ka jingsoi ia suk bad katei ka seng lehnoh, kan dei ka lynnong kaba nyngkong ban wanrah ia ka jingphyrnai ka Nagaland.
U General Secretary ka NSCN-IM u Thuing aleng Muivah, 81 snem u la wan ban ia soi ia suk ha ka jingialang kaba la long ha 7 Race Course Road. U chairman katei ka seng u Isak Chishi Swu, um shym la don ryngkat ha katei ka jingiasoi kular namar ba u dang don ha jaka sumar ha Fortis hospital, Delhi; hynrei la donlang pat u khun jong u, u Pasheto.
Ki lai tylli ki seng lehnoh kiba la pait na ka NSCN(IM) ka NSCN-K, NSCN-U bad NSCN-KZ, kim shym la mynjur ia katei ka jingiasoi ia suk. Ka Naga People’s Movement for Human Rights (NPHMR) lyngba u Chairman jong ka, u N. Krome u la iathuh ba ka la lyngngoh bad kyndit ban iohi ia katei ka jingpynbna ba kynsan kynsan. Ha katei ka jingiasoi ia suk bad ka sorkar la donlang ruh kiwei pat ki nongialam rangbah ka NSCN(IM).