Sohsat ka Upper Shillong, ba dheng kali

Shillong,28 Lber:
Kam dei kaba la jia tang shisien ne ar sien ne tyngkhat lano bad ka jingdheng kali ha ki thaiñ Upper Shillong kam dei shuh kaba dang phylla bad la ju iohi ba kane ka ju jia manla ka lah sngi u blei bad manla ka sngi hat majai. Mynta ka sngi ruh ka la don ka jingdheng kali kaba jur bha ha katei ka thaiñ bad ka jingdheng kali ka dei tang ia ka lynti ban hiar na Upper Shillong sha Shillong katba ki kali kiba wna na Shillong ban leit sha Sohra, Pynursla ne thaiñ West Khasi Hills pat ki iaid beit khlem jingthud.
Mynta ka sngi u nongthohkhubor u la lap ba ka jingdheng kali ha ki thaiñ ka Upper Shillong ka la sdang ter ter naduh na San mer haduh ban da poi ha jingkieng Umshyrpi. Bun ki paidbah ki ia thnum ha ki kali iew kali hat ia katei ka jingdheng kali kaba manla ka lah sngi u blei bad sngi hat majai. Ka la pynlyngngoh ia kiba bun ba lang ia katei ka jingdheng kaba ki shu ia antad ioh ka don jingjia aksiden pynban hynrei katba nanghiar sharum ka jingdheng kali ka nang kham stang ter ter haduh ban da poi Lai mer ki kali ki la kham i sting bad haba la poi ha Umshyrpi la lap ba kam don eiei kaba pynwit ia ka lynti hynrei ki kali ki iaid beit.
Tang na San mer shaduh sha Umshyrpi mynta ka sngi ka la shim por haduh kumba shi kynta shiteng haduh ar kynta duna ban iaid lynti. Bun ki paidbah ki la khnium bha ia katei ka jingdheng kali kaba arsien shi taiew ha Upper Shillong hynrei ki la ong ba kim banse ban pat ban iaid ba ki hap ban beh kam beh jam.