Sohsat ka shnong, ba lum thup sah ïa u dewïong lah 3 snem

Shillong:Namar ka jingsngew sohsat ka jingwanrah jingeh jong u Dewïong ba la lumthup hapoh ka jaka jong ka shnong, na ka liang ka Dorbar Shnong ka Mawlai Mawïong ha ka sngi Palei, ka la leit ban ïakynduh ïa ka Deputy Commissioner ka East Khasi Hills District.

Ha kane ka jingleit ïakynduh na ka liang ki nongïalam shnong ki la ujor ha ka Deputy Commissioner ka East Khasi Hills bad ban kyrpad ïa ka ban phah khat noh ïa u Dewïong uba la kurup na ki kali kit beaiñ ba la wan theh hapoh u pud u sam ka Mawlai Mawïong.
Kitei ki nongïalam shnong ha ka jingleit ïakynduh ki la ïathuh ba utei u Dewïong ba la kurup u la long ka daw ka jingeh ïa ka shnong bad ïa ki nongshong shnong namar ba ka la pynwit ïa ka shnong ka thaw, pynjaboh ïa ki um ki wah bad ïa ka mariang.

Na ka liang u Rangbah Shnong u Bah S Lyngdoh haba ïakren bad ki lad pathai khubor u la ong ba la lai snem une u Dewïong u don ha katei ka jaka hynrei ka bor district kam leh eiei ban khat noh watla ka shnong ka la ujor man la ka por.
Kumta u la ïathuh ba ka shnong ka la kyntu jur ïa ka DC ba ka dei ban phah khat noh mar mar ïa u Dewïong, lym kumta, ka shnong kan leh hi noh ïa kaba donkam.