“Sniew tam ki surok East Jaintia”

Jowai, 26 Naiwieng:
Ka East Jaintia Hills District ka long kawei naki District ba shah ktah tam ha ka jingsniew surok, ong ka KSU. La iathuh ba marsien rung sha katei ka District kata naduh Tuber-Sohshrieh ter ter haduh Malidor(khappud Assam) ladap satang ki thliew ki syar suda habor shilynter ka surok NH44.
“Kane ka jingsniewdur katei ka surok ka long ka jinglehrain iaka jylla baroh kawei khamtam iaki nongmihkhmat ka thain kata naduh ki MDC, MLA bad wat u MP ruh udei na katei hi ka thain” ong shuh ka KSU Khliehriat, ha ka jingpynmih khubor mynta ka sngi.
Katei ka kyrwoh, ka ong shuh shuh ba ki Sengbhalang kum ka KSU, HANM bad HNPF, ki la dep pynlong wat daki jingiakhih kum ka pakhang shnong bad pakhang surok miet ruh naka bynta ban dawa naka sorkar ban pynbha bad maramot ia katei ka surok hynrei ka sorkar kam sngap eiei bad ka lapmiet pynban tang ha kaba shu kular kai iaki sengbhalang.
Halor katei ka bynta naka liang ka Khasi Students Union Khliehriat Circle ruh sa shisien ka buh ka jingdawa kaba jur naka sorkar ban maramot noh mardor ia katei ka surok hapoh katei ka District, ong ka kyrwoh bala pyllait da u Samla C. Suja General Secretary ka KSU Khliehriat Circle.
Katkum ka kyrwoh naka KSU la ong ba ka jingsniew ka surok NH44 khamtam ki jaka haki bynta jong ka Lad Rymbai, ka buh shisha ka jingma iaka koit ka khiah ki paidbah nongleit nongwan naba jur ka jingpum pum jong katei ka surok.
Ka jingsniew ka surok ha katei ka District ka wanrah iaka jingdheng kali bajur ha katei ka thain bad kane ka ktah iaki paidbah bad leit donkam kyrkieh. Khatduh naka liang ka Seng ka dawa naka sorkar ban maramot noh shisyndon ia katei ka surok, lym kumta naka liang ka Seng kan iaid shakhmat daki jingiakhih paidbah la pynkut ka kyrwoh na u Samla C. Suja General Secy ka KSU Khliehriat Circle.