Sniew ka imlang sahlang na ki mendih drok,ong u DC

Shillong, 16 Iaiong:
U Deputy Commissioner ka East Khasi Hills u Sanjay Goyal u la ong ba ka jingjur ka jingdih buaid ka pynjot ia ka suk ka sain ha ka imlang sah lang. Ki bor ba halor ki la rai ba kin kynthup ia ki khynnah samla kum ki ‘paralok’ ban khanglad ia kine ki jingjia ha kane ka district.
U Goyal u la ong ba ki jingdih buaid ka ialam sha ki kam tuh kam thiem bad kiwei kiwei de ki kam ba lah ban ialam sha ki jingbakla.
U la ong ia ki jingdih buaid la die da ki briew kiba beain kiba pyrshang ban pyndonkam da ki khynnah samla na ka bynta ba ki thied ia ki ktang suloi ban ialeh pyrshah bad ka jylla baroh kawei.
Ia kane ka jingkren u Goyal u la ong ha ka jingpynshai padibah halor ka‘Drug Abuse, Traffic Rules & Cyber Crime’kum shi bynta ban ‘Safe-Secure-Shillong Project’ ba la pynlong da ka East Khasi Hills District Police mynta ka sngi ha Dinam Hall ha Jaiaw.
“Ka jingpyndonkam ia ki jingdih buaid ka pynpra ia ki iing ki sem, bad ka ktah ruh ia ka imlang sahlang”, la ong u Goyal.
U la ong ba ki briew ha ka nongbah Shillong, ki shah ialam bakla ha kiba bun ki bynta ha ka jingstad internet, wat la ki pulit ki la ju pynmih ia ka jingpynbna man ka por ban long kiba husiar.
U Goyal u la kyntu ia ki skul ban shim khia ban pynsngewthuh ia ki khynnah bad ki samla pule ban lait na kane ka jingma.
Katba u SP ka East Khasi Hills u Bah Mariahom Kharkrang u la pynpaw ba ki kam sniew ki la nang kiew ha kane ka district ha ka liang ki mendih drok.
 ”Wat ki khynnah skul, ki shah ialam bakla bad long mendih drok”, la ong u SP.
U Kharkrang u la ong ba ka la don ka jingnang kiew ha ka jingdon ki mendih drok bad kane ka la ialam sha kiwei pat ki kam sniew.
U Bah Kharkrang u la iathuh ba 18.75 per cent kiba shah kem kiba dih drok dei kito ki bym nang bym stad bad 37.50 per cent  ki dei kiba la pep skul shiteng por. U Bah Kharkrang u la iathuh ba baroh ki kam beain kiba la rejister ha ka NPDS Act ha u snem 2009-2014 tang ha East Khasi hills district ki don 55 bad 63 ngut ki briew la shah kem ha ka ain NPDS Act naduh snem 2010-2014.