Shillong:Ka jingthut jong ka mobile cell one sha ka thain Sohra, Pynursla, Dawki, ka long kaba la jubor ha kine ki sngi bad katei ka la pyn bitar shla ia ki nong buh mobile sha kane ka thain, kiba da ki hajar ngut, ki la shah ktah shi katdei.
Halor katei ka jingeh, kaba ki paidbah ki ia kynduh U Rupang, ula iakren bad arngut ki ophisar jong ka BSNL bad kitei ki iathuh ba kawei na ki daw, ka dei na ka jingbym thikna, ka bor ding sha katei ka thain bad nangta, sa kawei pat ka dei na ka jingsniew ki Cable.
La iathuh shuh shuh ba ka jingtuh bad ot ia ki Cable, ka jubor bha, sha ka thain Pynursla Dawki bad la iathuh ba dang ha ki khyndiat sngi ba ladep, la ot noh ia ki Cable, hajan Petrol Pump Pynursla, kumba 50 metre eiei bad katei ka la pynthut ia ki nongbuh mobile sha ka thain hi baroh kawei.
Ym tang katta, la iathuh shuh shuh, ba ki don ruh ki jaka ba shah pyndkut ki cable, na ka jingtih pynheh ia ka surok na Shillong sha Dawki bad katei ka dei sa kawei pat ka daw, kaba pynsniew shi katdei ia ki mobile sha ka thain.
Nalorkata, ki don ruh bun ki jaka buh ia ki tnum mobile ha ka thain, ki bym don tang ki generator bad la shu shaniah, ha ka jingwan jong ka ding ilektrik bad tang shu la duh ding, kumta kitei ki tnum, kim trei kam shuh satia.
Mynta ka thain Sohra ruh, ka don jingthut shibun, namar ka jing thep ia ki nar um, kaba dang iaid ha kine ki sngi bad la iathuh ba kitei ki nar um, la shu thep, khlem da iakren pynbeit bad ki bor jong ka BSNL.
Ha kawei pat ka liang, ka don ka khubor ba bha, sha katei ka thain bad kata ka long ba ka BSNL, ka la pynpoi ia ka internet sha Sohra, lyngba ka FTTH, kaba dei ka lain kaba dang thymmai bad kaba kham biang shibun, katba ha Dawki bad ha Pynursla, kin pyn treikam shen, da ka Air Fibre, ha kaba yn buh da ki antennae, ha ki jaka bapher bad ba kitei kin sa pyniaid ia ka internet sha kitei ki jaka.
Kaba la ujor, da ki briew jong ka BSNL, ka dei halor ka jing ot dusmon bad ka jingtuh ia ki cable, kaba iai jia na ka por sha ka por bad katei ka buh jingeh shibun ban maramot bad bujli, man ka por ia ka lain pyniaid ia ki cable.
Phi don ban ong eiei?