Sngi Balang ka jingialang ki 25 ngut ki CEM District Council

Shillong, 6 Naitung:
Ka jingialang bah jong ki Chief Executive Member (CEMs) jong ki Autonomous District Councils (ADCs) ba la khot da ka KHADC kan long ha ka sngi Balang ha ka nongbah Shillong.
Ka tymmei khubor ka la iathuh ha kane ka sngi Nyngkong ba ka KHADC ka la khot sngew bha ia baroh ki CEM jong ki ADCs kiba dei na kane ka Thain Mihngi ha kane ka jingialang ban iakren ia ki kam kiba iadei bad ka Sixth Scheduled.
“Ngi khmih lynti ban wan poi kumba 25 ngut ki CEM jong ki ADC bapher bapher ha kane ka jingialang” la ong ka thymmei khubor.
La iathuh ba ka KHADC ka pyrshang ban khot ia baroh ki CEM ka  ADC kane ka thain ban long kawei ban iatylli halor ka jingthmu jong ka sorkar pdeng ban pynkylla ia ka Sixth Scheduled  ka riti synshar ka ri.
Ka khubor ka la iathuh ba ka jingialang kan iakren ruh ia ka jingbym lah ka 14th Finance Commission ban pynrung ia ka jingbhah pisa ia ki Autonomous District Councils (ADCs)  mynta u snem.
Ha kane ka jingialang, la sngewthuh ba kan don ka jingtyrwa na ki nongialam ka KHADC ban kyntu ia ka sorkar pdeng ba kan ai bhah pisa ia ki ADC na ka Consolidated Fund katkum ka kyndon Article 275 (1) jong ka riti synshar ka ri kumba la pdiang da ki dkhot ka 14th Finance Commission.