Shillong:U MDC ka Mawhati Konstitwensi u Bah Charles Marngar, u la pynpaw ïa ka jingsngew lehraiñ bad sngewsih hadien ba ka KHADC ka la shu kular kai ban buh kano kano ka Forest Gate ha ki thaiñ khap pud ka Block-II katba ka Karbi Anglong Autonomous District Council ka la buh ha ka jaka bym don ba longtrai mano mano ruh.
U la ong ba ha ka Dorbar lyïur ka la dep u EM ba khmih ki kam khlaw u la kular ba hapoh shi taïew ynbuh noh bad balei naduh katei ka por ka Council kam lah ban buh katba ka hukum na ka sorkar jylla ban khang noh ïa baroh ki khyrdop kam pat mih.
“Katei ka thaiñ ka dei kaba shah pynthut palat kiba shong basah ki paradoh parasnam, shah pynshitom ki nongrep, lada ha ka por ba ïohlad bym pat pynmih hukum ka sorkar jylla ym lah ban leh mynta lei ba la hap pynbeit shwa shano kan poi katei ka jingkular,” ong u Bah Marngar hapoh Dorbar Lyïur ka KHADC.
U la ïathuh ba ki nongrep ki la kmen, hadien ba u la leit ïathuh ïa ka jingkular ka KHADC ban buh gate hynrei mynta long kumba thok bad u la sngew lehraiñ ban leit sha katei ka thaiñ khappud, bad hadien ba la tip ïa kane ka jingkular kai u la phone ïa u EM la bunsien khlem ïoh jubab eiei.
Haba bynrap lang ïa kane, u MDC ka Mawkhar Pynthorumkhrah Konstitwensi u Bah PN Syiem u la ong ba ïa ka KAADC ym don ba khang balei ka council kam lah.
“Sha shiliang ka Wah Ummat na ka Wah Umlet kadei kaba la pynïaid da ka KHADC, kumta hapdeng kine ki wah ka KHADC ka lah ban buh ïa ka khyrdop forest,” bynrap u Bah Syiem.
Haba ong ba ka KHADC ka la leit jurip, na ka liang u Bah Marngar u la pynpaw ka jingkyndit ba u khlem tip eiei.
Katba u MDC ka Mylliem Konstitwensi u Bah Bah RV Lyngdoh u la ong ba dei ban don noh da ka Assurance Committee ban buddien ba lada ïa ki kam ka KAADC ka lah ban leh, balei pat ïa ka KHADC ymlah ne shah khang.
Haba jubab ïa kitei u CEM u la ong ba ka Block-II kahab hapoh ka jingïakajia pud bad ban dang pynbeit ha ka Phase-II ïa u pud u sam hapdeng ka Meghalaya bad Assam hynrei ka KHADC ka dang khmihbniah la ka long ne em ban buh ki gate bad namar ka hukum ka sorkar jylla ban hap khang lut baroh ki khyrdop kumta hap sangeh shwa tat haduh ban da lah pynbeit bad ka sorkar jylla bad kaba sah mynta ka long ba kumno ynleh bad hangno ynbuh bad ka ophis ruh ka la dep leit jurip.
Haba ïadei pat bad ka Assurance Committee, u la ong ba lada ka AD Rules ka shah ka EC kan pyrkhat.
Phi ki ba don shajngai na ka block 1 ne block 2 sngew bha wat shuhun Kum ki ksew kohnguh ka khlieh kyrngah ka tdong ngi kiba shong ha kane ka shnong te ki jingeh ngi mad mangi da long ka balah te wan ban Weng noh ia ki forest ki ba dei na Assam buh ki ba dei na maghalayà lem Kumta te lah ban ktah ia ka rep ka riang jongngi hangne border