Sngewsih U Bah Bindo, bym shim bynta ki seng sain pyrthei

Shillong, 28 K’lyngkot:
U nongialam ka UDP u Bah Bindo M Lanong u la pynpaw ia ka jingsngew sih ia ka jingkhein sting jong kiwei ki seng sain pyrthei ban pep sha ka jingialang ban iakren ia ka mat kaba ktah ia ki Rangbah shnong namar ka jingpynmih hukum ka Kashari High Court ka Meghalaya.
“Nga pynpaw ia ka jingsngewsih ba kiwei ki seng sain pyrthei kim shym la wan ban iashim bynta ha kane ka jing ialang kaba khia ban iakren ia ki kam ba ktah ia ka synshar khadar jong ki shnong ki thaw”, la ong u Bah Bindo haba kylli kaei ka jingsngew jongu haba bun kiwei ki seng kim shym la wan sha ka jingialang.
Ha kane ka jingialang ba la khot da ka UDP, la wan ban iashim bynta tang ka KHNAM, NPP bad ka GNC kaba ai da ka jingthoh ban kyrshan namar ba kam shym la lah ban wan. Kiwei ki seng sain pyrthei kiba khlem wan ha kane ka jingialang ki long ka Congress, ka NCP, BJP, HSPDP, bad ka CPI (M).
“Ngi la dep thoh shithi ngi la iawer lang ia ki ban wan sha kane ka jingialang hynrei kim shym la wan. Kaba nyngkong ka ka long ba nga pynpaw ia ka jingsngewsih ia kane ka jingbym wan jongki bad kaba ar ka long ba ka bha ba phin kylli sa na ki (seng sain pyrthei)”, la ong u Bah Bindo haba kylli ki nongthoh khubor halor kane ka jingjah klep jong kiwei ki seng sain pyrthei.