|
Shillong: U Lat ka jylla Meghalaya, u Tathagata Roy, u la pynpaw ka jingsngew sarong bad jingsngew lehrain halor ka jingjia shah thombor ki pulit CRPF ha Pulwama bad ka jingleit ther bom kyndit ki shipai iada ia ki jaka ba shong ki lehnoh Jaish-E- Mohammed ha Pakistan.
 U la ong ba kane ka jingshah thombor ha Pulwama (ha ka 14 tarik u Rymphang) bad ka jingleit ther bom kyndit (surgical strike) da ki shipai ia ki jaka sah lehnoh ha Pakistan 12 sngi hadien ka jingshah thombor ki pulit CRPF Pulwama, ki don ki bynta ban sngew sarong bad sngewsih.
“Balei ngi hap ban sngew sarong namar ba tang hadien 12 sngi ka jingshah thombor ha Pulwama ia ki shipai CRPF….ki shipai ki la jubab kylliang da kaba rung sha Pakistan bad ther bom ha ki jaka ba rieh tngen ki lehnoh bad kane ka pynshisha ba ka India kan shong kli kti bad shah jem”, la ong u Lat ha ki nongthoh khubor khubor hadien ka jingialang ha Assam Regiment Centre, Happy Valley.
“Ha kawei pat ka liang kiei kiei kiba pyn-sngewsih ki long ba ki don ki briew ki pynpaw jingsngew artatien halor ka jingleit ther bom kyndit watla ka don ka jingshisha…ym tang ki nongialam seng sain-pyrthei hynrei wat ki ophisar shipai ba tbit kumjuh”, u la ong.
“Ngi dei ban sngewthuh ba ki shipai India ki kham tbit bad kim long kum ki shipai Pakistan…ki shipai India ki tbit la ki don ha kino kino ki bynta ne hapoh kino kino ki nongialam seng sain-pyrthei katkum ba la buh”, u la ong.
“Haba ki ophisar shipai ba tbit ki ong ba ki don katto katne ki jaka ba la ther bom hynrei ban ialam bakla pyn-artatien bad kynthoh ba ka long ka bym lah ban pdiang. Kane ka dei kaba nga sngewsih bad sngew lehrain”, u la ong.
“Hynrei ki bor shipai ki la pyni da ka kam bad ngi la ïohi na bun ki bynta bad ki tyllong khubor na Pakistan ki la pyni ba ki don ki jaka kiba la shah ther bom bad nga ngeit ba ka Pakistan bad ki lehnoh ki la ioh jingsneng”, la ong u Lat uba la bynrap, “Kin nym mlien shuh ban pynklumar bad lada ki pyrshang kin sa ioh jingsneng”.
Haba kylli, ba ki kam lehnoh kim pat duna ha ka thaiñ shatei lam mihngi ka Ri India khamtam hadien ka jingjia ha Arunachal Pradesh, u Lat u la ong, “Ki kam pyntriem da ki lehnoh ka la hiar bha haba nujor ia ki 10 ne 12 snem mynshwa mynba dang don ka ULFA”.
“Ki kam pyntriem ki la duna bad kim don shuh kumba long mynshwa bad ki la mad ba ka Ri India kan nym shim sting ia ki kam lehnoh bad ki la mad ba kim lah shan ha khmat ki shipai, ki bor shipai. Ngi ngeit ba kine ki kam pyntriem da ki lehnoh kin sa jah lut noh”, la ong u Lat.
|
Phi don ban ong eiei?