Shillong: U Bah Adelbert Nongrum, MLA ka North Shillong Constituency, mynta ka sngi u la pynpaw ka jingkhublei ia ka Meghalaya High Court kaba la pdiang ka jingpan map jong u bad ruh ba ka la pynkut noh ia kane ka Case kaba la iaid 7 snem mynta.
Ha ka kyrwoh ka ba la phah da u MLA u bah Adelbert Nongrum u la pynpaw “Nga dap da ka jingkmen ba ka Meghalaya high Court ka la pynkut noh ia ka Case kaba la iaid la 7 snem mynta bad na ka liang jongnga, nga dap da ka jingkmen bad ka jingsngew nguh ia ka Meghalaya High Court ba ka la pdiang ia ka jingpan map jong nga“.
“Na ka liang jong nga,ngan bteng ban don ka jingshaniah ka ba skhem ia ka Constitution jong ka Ri India bad ia ka institution jong ka” la ong u bah Nongrum ha ka kyrwoh. Lah ban kdew hangne ba ka Meghalaya High Court ha ka 14 tarik u Kyllalyngkot 2015, ka la hukum ia u Registrar General jong ka Court ban khot tian bishar pyrshah ia u CEM ka KHADC ha kane ka por, u bah Adelbert Nongrum, namar ba u bah Nongrum u la kren khor palat pyrshah ia ka High Court.
“La hukum ia u Registrar General, ka High Court of Meghalaya ban rejistar ia ka hapoh ka Article-215, 266 jong ka Indian Constitution r/w Contempt of Court Act, 1971, namar ba nga lap ba ki jingkren u bah Adelbert nongrum ki dei ki jingkren kiba khor bad kiba um burom ia ka ing bishar” ong u Justice SR Sen ha ka hukum ba u la pynmih ha ka 14 tarik u kyllalyngkot 2015.
Ka ing bishar ka la sngew ktah palat ia ka jingkren u bah Adelbert Nongrum kaba la pynmih ha ka 30 tarik u Nohprah bad ha ka 8 tarik u kyllalyngkot mynta u snem pyrshah ia ka hukum ka ing bishar ba la pynmih da u SR Sen ha u nohprah 2014, kaba dei ruh ka hukum kaba pynkhih win ia ki khlieh nongsynshar.
Ha kajuh ka hukum ba la pynmih u nongbishar, u la ong ruh, “Nga lap ba u bah Adelbert Nongrum u thmu ban khein kamkai bad khein poh ia ka ing bishar bad u la kob haba paw pyrshah ia ka ing bishar, ngam lah ban sngewthuh ha ka jingbishar kaba la pass ha ka WP (C) No. 363 of 2014 kaei ka jingmut, kaba u bah Adelbert u la pynkut ruh ia ka jingthoh da kaba ong ba ka don kaei kaei shalyndet halor ka hukum ka high Court kaba long pyrshah ia ka jaitbynriew rit paid”.
“Katkum ka jingsngew jong nga, nga sngew ba u bah Nongrum u pynshit bad ialam bakla ia ki paidbah bad ki daw dei tang ma u hi uba tip, lada uno uno um sngew iahap ia ka jingpynmih hukum ka ing bishar u lah ban phah da ka jingkyrpad hynrei um don hok ban pyrshah ia ka ing bishar lane ban pynmih kino kino ki kyntien khor pyrshah ia u nongbishar” ong utei u nongbishar, U nongbishar, u la ong biang ba ka hukum ka ing bishar kaba la pass ha ka WP (C) No. 363 of 2014 kam shym la thoh kano kano ka hukum kaba don ka jingthmu ba sha lyndet, u nongbishar um don jaitbynriew, um don niam, um don ktien lane ki mat jingmyntoi shimet hynrei ka thong jong u dei tang ban ai ka jingbishar hok bad ban pynthikna ba ka ain kan iaid ka ain katkum ka riti synshar ka ri.
“Nga kren shai ba kane ka ing bishar kam long pyrshah ia kano kano ka dustur tynrai, lane ka jingngeit ki briew” u la ong biang da kaba pynkut ba “Ka dei ruh ka jingshisha ba kam don kum kata ka jingleh ba U Rangbah Shnong un lah ban ai NOC lane ban tuklar ia ki kam pyniaid district lane ia ki kam ki pulit”.
Katkum ka hukum, u Justice SR Sen u la bthah ia u Registrar General ka High Court ka Meghalaya ban pynngat mukotduma katkum ka Article-215, 266 jong ka riti synshar ka ri kaba hap ha ka Contempt of Court Act, 1971, “Namar ba la shem ba ka jingkren jong u Adelbert Nongrum ka long kaba pynjah burom ia ka Kashari”. U nongbishar Sen, u la bthah ia u Registrar ban pan jingshai pyrshah na u Bah Nongrum bad ar tylli ki kot khubor phareng ka The Shillong Times bad ka Meghalaya Times, halor balei ba kim dei ban shah pynngat pyrshah ia ki ha ka ain, namar ka jingkren pynjah burom ia ka Kashari kaba la mih ha ki khubor jongki.
“Ai ba ka jingthoh yn leh da u Deputy Commissioner, ka East Khasi Hills lem bad ka kopi jong ka hukum bad ka kot khubor kaba la kdew ia ka jingkren. La bthah ruh ia Deputy Commissioner ban pyndep ia kane ka kam hapoh ar sngi da ka affidavit,” la ong ka hukum. “Uba shah ujor u dei ban wan da lade bad ban phah da ka jingjubab ha ne shwa ka 27 tarik Kyllalyngkot khlem pep. Yn nym ai lad ban pyntud halor kane ka kam”, la ong ka hukum.
Ka Kashari ka shim ia kane ka sienjam halor ka jingkren jong u CEM ka KHADC kaba la pynmih da ki lad pathai khubor ha ka 31 tarik Nohprah ha Meghalaya Times) bad ha ka 8 tarik Kyllalyngkot ha The Shillong Times), uba kren pyrshah ia ka rai jong u SR Sen halor ka kam rangbah shnong.
Bah Adelbert Nongrum is the best.