Sngewnguh u kpa ba lait im ka khun

Jowai, 6 Naiwieng:
U ma Skot Mukhim, ba shong ba sah ha Khlieh Wah Dupon, Ladrymbai uba dei u kpa jong ka Yami Pakma, ka khynnah ba dang saw snem kaba la shah rahbor ha ka Sita Sayoo bad die ha ka Tiplangki Rynjah ha ka dor kaba T.25,000, ula pynpaw ia ka jingsngewnguh kaba khraw ia ka seng HNPF kaba la ialeh shitom ban iarap ban pynioh biang ia katei ka khun jong u hadien ba kala shah rahbor la 8 bnai mynta ha ka kynhun jong kitei ki runar. U ma Skot um lah ban ai khublei iwei pa iwei na ki dkhot jong ka seng, hynrei ula ai khublei kyrpang kyllum lyngba u President ka seng u ma Marshall Biam. Ha ka juh ka por u ma Skot ula sngewnguh ruh ia ka tnat Pulit kaba la iarap lem ban synran ia ka seng HNPF ha kaba leit shimti ia ka khun jong u na shnong Namdong, West Jaintia Hills District.