Sngewnguh ka shnong Mowkyndeng, ia 4 ngut ki samla jong ka shnong ba pyllait im ia 2 ngut ki kynthei

Shillong: Kat kum ka kyrwoh ba la ioh na u Waheh Chnong Mowkyndeng, ha ka janmiet jong ka 04tarik Naitung 2021, ar ngut ki kynthei ba la tip kyrteng kum ka Finie Suchiang 18 snem, (khun jong ka Iolanda Suchiang) bad ka Arkini Suchiang 12 snem, (khun jong ka Macdalin Suchiang) kiba na ka shnong Mulieh, West Jaintia hills, ki la ngam jyllop ha ka wah Syllek (Tyngkla) ha ka jaka ba den ia kane ka wah kaba don hajan ka shnong Mowkyndeng, WJH, hynrei da ka jingiarap jong ki 4 ngut ki samla naka shnong Mowkyndeng kynthup ia U Waiphangki Pala ba la juh khot ieid U Maidong (22 snem), U Thranglut-o-ki Pala (17 snem), U Onyxstone Pala (19 snem) bad U Kyrpang-i-man Suchiang (19 snem) ki la lah ban pyllait im ia kine ki kynthei.

Katkum ka jingiathuh jong u Waiphangki Pala, u ong ba kine ki khynnah kynthei ki ialehkai, ha kane ka wah bad kynsan u iohsngew ba kawei na ki ka pyrta bad khot jingiarap, khlem da pynslem shuh u la noh shapoh um bad ula jngi ban iarap ia kane ka kynthei. U la ialeh tyngeh ban tan bad pyllait ia ka bad hadien kane ka la iathuh ba sa kawei ka khynnah ka dang don shapoh um. Mar mar U Waiphang lem bad ki 3 ngut ki samla kila jngi bad ngam shaduh sha duh sha trai ka jingjylliew jong kane ka wah ban wad ia kane ka khynnah.

Hadien kumba 3 ne 4 minit jong ka jingwad, U Thranglut-o-ki u la lap ia kane ka khynnah bad mar mar ki la ia sei ia ka napoh um bad kane ka khynnah kam tip briew shuh ki dang mut ba kam don shuh. Kumta ki la sdang ban khniot ia ka naka shadem (CPR) bad pyrsad mynsiem ruh na ka shyntur jong ka. Hadien kumba katto katne por kane ka khynnah kala prie ia ka um bad ka la lah ruh ban ring mynsiem biang hynrei kam pat tip briew.

Mar kumta hi kine ki samla ki la pyntip ia kane ka jingjia sha kiba ha iing jong kine ki khynnah. Ia ka Arkini Suchiang la pynkit noh ia ka sha CHC Laskein. Namar ka jingtlot bad kam lah ban ring mynsiem bha, kim lah shuh ban sumar iaka ha CHC bad la phah ban kit noh iaka sha ki Hospital sha Jowai bad mynta kane ka khynnah ka la don hapoh ka jingsumar jong ki doctor ha Dr. Norman Tunnel Hospital, Jowai. Kat haduh ba pynmih ia ka ne ka khubor, la ioh jingtip ba ka la nang ioh bor.

Na ka liang jong u Waheh Chnong Mowkyndeng, u la sngewnguh shi kat dei eh ia ka jing long shlur jong kine ki 4 ngut ki samla bad ruh u kitbok kit rwiang ia kine ki kynthei ba kin ioh kloi ia ka met ba koit ba khiah.