Shillong: Ka kmie jong kawei ka khynnah kaba la ioh ban pyllait noh na Meerut, myn hynnin ka sngi ka la ai khublei ia baroh kiba don bynta ha ka jingpyllait im ia ka khun jong ka kaba shah rahbor ha uwei u briew uba treilang bad ka ha Delhi.
Haba iakren bad ki lad pathai khubor, ka kmie jong kane ka khynnah ka la iathuh ba ka khun jong ka, ka la shah pynbiej ha utei u briew naduh ba sdang ka lockdown ha ka Ri baroh kawei bad la ioh jingtip halor kane tad haduh ba ka kmie ka la ioh ia kawei ka message lyngba ka khun jong ka ba phah lyngba ka phone.
Ka la iathuh ba ka khun jong ka leit trei sha Delhi ha u bnai kyllalyngkot bad ka sah ryngkat bad iwei I bahaing jong ka. Mar ia pynbna ia ka lockdown, une u briew u la khot ia ka sha Meerut da kaba pynbiej ia ka.
U advocate Amit Joshi u la iathuh ba kane ka khynnah ka la shah lehbeiñ bad ka la shah leh beijot ha une u briew hadien ba u la ioh ka kabu ban ialam lang ia ka. Mar ia ioh jingtip halor kane la ujor da ka ejahar ha Madanrting Police Station bad la pyntip ruh sha ki pulit jong ka Meerut Police Station.
U bah Lambor Malngiang, MLA ka Nongkrem u la iarap mardor ban lap ia kane ka khynnah, u la iathuh ba une u briew u la ialeh ruh ban pynkylla niam jubor ia kane ka khynnah. Ha ka jingleit pyllait im ia ka, u la iathuh ba ka dei ka kamram jong u ban iarap ia ki paidbah na ka constituency jong u.
U la kyrpad ruh ia ki khynnah samla jong ka jylla ban phikir haba ki leit pule lane leit trei shabar ka jylla. U la ong ia ki kmie ki kpa ba ki dei ban shimkhia bha ia ka leit ka wan, ia ka jaka sah, lane ka jaka ba ki pule bad ba ki jaka ba ki leit trei kin dei kiba kham shngain bad kaba biang na ka bynta ka jingshngain jong ki khynnah samla.
Ha kajuh ka por, la ioh jingtip ba ia une u runar la ioh ban kem noh da ki pulit jong ka Meerut Police station ha ka 28 tarik Nailir. La pynngat ia u ha ki kyndon section 264, 323 bad 342 jong ka IPC bad kumjuh ha ka kyndon jong ka Narcotics Drugs and Psychotropic Substances (NDPA) Act.
Phi don ban ong eiei?