Sngewlem ka Myntri ba khlad u Das

Shillong,4 Nohprah:
Ka Myntri ka tnad kam pohing ka jylla ka kong Roshan Warjri ka la pynpaw ka jingsngewlem sha ka lok, ki khun bad kiba haing hasem jong u Bisheshwar Das, u trai ka dukan sha ha Bishnupur uba la khlad noh na ka jingmynsaw jur hadien ba u la shah kawang petrol bomb ha ka dukan sha jong u. Ka la kular ba ka sorkar kan shim khia ban lap ia kito kiba donkti ha ka ban shim noh ia ka jingim utei u trai dukan bad kan pynshitom katkum ka ain. Ka kong Roshan ka la pynrem jur ia ki runar kiba la donkti ban leh ia katei ka kam pyntriem kaba la shim noh ia ka mynsiem briew. Ka la kular ba na ka liang ka sorkar kan shim ia ki lad ki lynti ban wahrah ia ka jingiashongsuk shong shngain ha ka ne ka jylla.