Sngewlem ka KSU ba khlad u dkhot

Shillong, 29 Rymphang:
Ka Khasi Students’ Union, seng kmie ka pynpaw ia ka jingsngew sih kaba Khraw halor ka jingkhlad noh ba kyndit jong u samla Orisiwell Sten uba long u General Secretary ka KSU Nartiang Circle ha ka 28 tarik mynta u bnai. Ka kyrwoh na katei ka seng ka la ong ba u samla Orisiwell u la long u dkhot ka seng naduh u 2009 ha ka por ba la pynkha ia ka KSU Barato Unit. Une u samla u long u ba shitrhem shikatdei eh ha kaba ia dei bad ki dawbah ka Jaidbynriew bad u long u bym ju kynran dien ha kaba ia dei ba ki kam ki jam ka seng. Ka KSU ka phah ia ka khubor sngewlem sha ka iing ka sem ka jong u lem bad kiba ieid ba thoiñ jong u bad ka ngeit skhem bad ki matti ki jong u kin long nuksa ia ki pateng ki ba hadien. Shuh shuh ka seng ka kitbok kitrwiang ruh ia ki ar ngut ki dkhot ka KSU Barato Unit kiba dang don ha ka jingshitom ba kin ioh noh kloi kloi ia ka met ba koit ba khiah krat.