Sngewlem ba khlad U President ka SBYWA

Khliehriat, 24 Jylliew:
Ka seng Federation of Khasi Jaintia & Garo People (FKJGP) Bataw Unit ha ka kyrwoh khubor ba la phah lyngba u President ka Seng, u samla Deihok Sumer, ula pynpaw ka jingsngewsih halor ka jingkhlad ba kyndit jong u President ka Seng Southern Border Youth Welfare Associa tion(SBYWA) Head Quarter Bataw Elaka Lakadong & Rymbai, samla Heimonmiki L. Tariang mynhynnin ka sngi ha ka por 4 baje janmiet.
U samla Sumer ula pynpaw ba kane ka jingkhlad jong u samla Heimonmiki L. Tariang ka la long ka jingduh nong bad ka jingsngewsih ka ba khraw ym tang ia ka iing ka sem jong u bad ruh ia ka shnong ka thaw, ka dong ka shnat bad ka Jaitbynriew hi baroh ka wei namar ba u long uwei na ki samla uba shakri lem ia ka bha ka miat jong ki paidbah. Shuh shuh kat kum u samla Sumer ula ong ba une u samla Heimonmiki L. Tariang ula long uwei na ki paralok ba u ia ieit bad uba nga shait ia phylliew jingmut manla ka por na ka bynta ka ban kyntiew ia ka bha ka miat jong ka imlang sah lang. U samla Heimonmiki L. Tariang ula shait long ruh uwei na ki nongialam ka JYF Bataw Unit ha ki snem 2010 – 2011. Katba ka Ka Seng Southern Border Youth Welfare Association(SBYWA) Head Quarter Bataw Elaka Lakadong & Rymbai, ka pynpaw ka jingsngewsih ia ka jingkhlad ba kyndit jong u president ba rangbah jong ka, u samla Heimonmiki L. Tariang mynta ka sngi.
U General Secretary jong ka u samla Nam phrangmi L. Talang u la ong ba ka jingkhlad jong u samla Heimonmiki L. Tariang uba dei u President jong ka seng ka la long ka jingduh nong bad ka jingsngewsih ka ba khraw ym tang ia ka iing ka sem jong u hynrei wat ia ka seng hi baroh kawei ka sngewsih halor kane. Kumta ka seng lyngba kane ka kyrwoh ka pyntip ruh sha manla kiwei pa kiwei ki dkhot jong ka seng ba phin sngewbha ban iawan pynsngewlem ia ka iing ka sem jong u bad ruh ba phin ia don ryngkat ha ka sngi leit ontep ia u ha ka 25 tarik u jylliew ha ka por 1:00 baje shaneng ha ka jaka Lumjingtep jong ka Balang Presbyterian Bataw, ong ka khyrwoh na u General Secretary ka seng, u samla Namphrangmi L. Talang.