Shillong:U Bah Ernest Mawrie, President ka Bharatiya Janata Party, jong ka Meghalaya, ula pynpaw ia ka jingsngew diaw mynsiem jongu, halor ka jing iai bteng jong ka jingkhang ka tnat shang pyrthei ha ka Jylla, na kane ka jingiai bteng ka jingkhang jong ka sorkar Jylla.
U bah Mawrie, ula iakren ia katei ka mat, ha ka jing iakren da ka video conferencing bad U JP Nadda, President jong ka seng BJP, uba iakren bad ki nongialam jong ka seng BJP ha ka Jylla mynta ka sngi.
U Bah Mawrie, u iathuh ba ha ka jing iakhun ia kane ka khlam covid 19, ka seng BJP, ka la sam ia 44687 song ki jingbam, sa 1,10,800 ki jingsop khmat bad 18,300 bitor ki jingsait kti sha kito kiba donkam eh.
Ha ka jingiakren U bah Mawrie, ula pynpaw ia ka jingsngew khia, halor ka jingkhang ka tnat shangkai pyrthei bad u kwah ia ki nongialam ka sorkar India, ba kin shimti ban peit ba kan plie noh katei ka lain treikam.
U Nada, u ai jingiaroh ia ka seng, kaba iarap ia kiba donkam ha kane ka pakhang shnong bad u ai jingiaroh ia ki nongtrei jong kane ka seng, kiba pyn iasnoh ia ki paidbah, lyngba ka ‘sampark abhiyan’ bad ula iathuh ruh halor ka jing myntoi jong ka skhim Atmanirbhar Bharat, kaba la pynbna da U Narendra Modi, myntri rangbahduh ka Ri bad U Nada, u sngew kmen shibun, ia ki paidbah ka Jylla, ha kaba ki la jer kyrteng da U Khaw Modi ia u khaw, uba la sam na ki dukan reshon.
U JP Nadda, ula pynsngew ruh ba ha kane ka pakhang shnong, kam don kano kano ka seng sain pyrthei, kaba mih shakhmat, hynrei, baroh ki don ha ki kamra AC jongki, lait noh tang ki dkhot ka BJP, kiba leit ban iarap ia ki paidbah.
U Ram Madhav, National General Secretary jong ka seng BJP,ula pynsngew ia ki nongialam jong ka seng ha ka Jylla, ba kin pynkhlain ia ki jingtrei kam jong ka seng, ba kin lah ban shakri bha ia ki paidbah kiba donkam.
Phi don ban ong eiei?