Sngewkhia u Rangbah Dong halor ka jingai Containment Zone ia ka dong Chinapatty, Malki

Shillong: U Rangbah Dong jong ka dong Chinapatty, Malki, Bah P Kharpuri, u la pynpaw ba ka long kaei kaei kaba pynlyngngoh ia ki namar ba na ka liang jong ki nongkitkam jong kane ka dong ki khlem ioh jingtip eiei tad haduh ba mih ka order ba ia kane ka dong la pynlong kum ka containment zone.

Haba iakren bad u nongthoh khubor, u Bah P. Kharpuri,u la ong,”Ha ka jingsngewthuh jong ki paidbah, la pyntip ba lada don ki positive case ha kano kano ka jaka, te ki hap ban pynbna mardor kum ka containment zone, hynrei ha dong jong ngi, ngim shym don kino kino kiba pang na u COVID-19, tangba ha ki por ba la leit, I don iwei I high risk contact, la rah bad la test ia I bad la lap ba im shym la ioh ia uta u khñiang jingpang bad la phah ban quarantine ia I sha Umsawli kumba bthah ka tnad jong ka koit ka khiah. Te, ha ka 24 tarik u Naitung I la wanphai biang sha shnong ha ryngkat ka jingdon lang ki bor shnong bad ki nongkitkam dong, bad I la leh mynta ia ka home quarantine.”

U la pynpaw ruh ba u sngewlyngngoh ba kiwei pat ki dong kiba iajan tang kumba 4 lane san pruh na ka ïing jong iwei iba pang COVID-19 lane ba la tip kum ka hotspot ha ka dong Nongshiliang, ki khlem pynbna kum ka containment zone namar kine kiwei ki dong ki ialong syndait bad kane ka iing. U la buh ruh ia ka jingkylli ba ha kano ka rukom ka sorkar ka pynbna ia ka containment zone khlem da wan kynjoh ktien bad khlem da wan peit thikna ia ka long ka man jong ki shnong namar kan shem jingeh ban ai jingpynbna sha u paidbah ba shong ha kane ka dong ban tip ia kaei kaba jia khlem da kynjoh ktien shuwa. U la ong ruh ba ka tnad jong ka koit ka khiah ka donkam shwa ia ka jingpeit bniah ryngkat bad ki bor shnong, ki bor dong ban lait wanrah ia ka kynrum kynram hapdeng ki paidbah namar bun ki la hap shu ieh noh ia ka jingbylla ban wanphai noh kloi sha ïng hadien ba pynbna ia ki jaka kum ka containment zone watla ym shym la don case satia.

Ha kajuh ka por, u Bah P. Kharpuri, u la iathuh ba u la phah ia ka shithi bad u la iakren ruh lyngba ka phone bad ka Deputy Commissioner jong ka East Khasi Hills, I kong Matsiewdor War Nongbri, ban weng noh ia kane ka jaka na ka thup jong ka containment area lada ka health department ka shah, bad I kong Matsiewdor War I la kular ba in sa pynbeit bad in sa peit bniah halor kane ka bynta.