Shillong: Ha ka 8 tarik u Nohprah, 2018, ka St. Edmund’s Kolej ka la pynkup burom ïa ki 85 ngut ki samla kiba la ïoh bat ki kyrdan kiba pher ha ki eksamin jong ka snem 2018 ba la pynlong da ka NEHU. U Bah Lahkmen Rymbui, uba long u Minister ka Pule Puthi, ka Border Area, ka Forest bad Environment u la long u Kongsan.
Ha ka jingkren jong u, u la ai khublei ïa ki samla kiba la pas bha, ïa ki kmie ki kpa jong ki bad kiba ha ïing ha sem bad kumjuh ïa ka kolej. Ha ka jingkren jong u, u la pynpaw ïa ki jingïakynduh kiba pher mynba u dang long u samla pule ha St. Edmund’s Kolej bad u la ong, “U Br. M. G. Shanon bad Br. D’Souza ki la ïohi ïa ka sap kaba pher ha nga kiba kiwei kim lah ban ïohi bad dei kata kaba la pynkylla ïa ka pyrkhat ka pyrdaiñ jong nga.” U la pynpaw ka jingsngewnguh ïa ka Kolej bad u la khot ïa ki khynnah kiba la pas bha bad kiwei, “Phi dei ban lap ïa ka jinglong pher kaba don ha phi khnang ban kiew.” U la ong ruh, “Lap ïa ka jingkhlaiñ jong phi bad trei minot ban kiew.” U la kyntu ruh, “Ïajan bad la ki nonghikai bad leit sha ki haba don ki jingeh ha ka jingpule.” U la pynpaw ruh ka jingsngew diaw ba ki samla Khasi kim shim khia ïa ki eksamin ba la pynlong da ka UPSC bad dei na kata ka daw ba duna ki ophisar ha ki kyrdan kiba hajrong ban btin lynti ïa ka Jylla. U la khot ïa ki samla ban sumar bad pynneh ïa ka mariang ym tang ïa lade hynrei na ka bynta kiwei ha k pateng ki ban dang wan. Ki Nonghikai ki la sam ïa ki khusnam sha ki samla pule bad u Kongsan pat u la sam sha kito kiba la ïoh bat ïa ka kyrdan kaba nyngkong. U Dr. Sylvanus Lamare, haba ai khublei bad jingïaroh ïa ki samla pule, u la khot ruh ïa ki, “Khmih shajrong bad nang ïai phohsniew ban kiew da kaba trei shitom bad kynmaw ba ha Kolej phi la kiew ym tang ha ka jingpule hynrei wat ha kiwei ki sap bad jingtip”. U Br. Simon Coelho, u la ong, “U Bah Lahkmen Rymbui u ieit ïa ki khynnah na kata ka daw u kloi ban ïadon lang bad ki haba ki kiew bad pas bha.” La ïadon lang ki kmie ki kpa, ki nonghikai bad ki samla pule ka semester kaba hynriew. Ïa ki kyntien pdiang burom la ai da u Prof. M. Chakravarty bad ki kyntien khublei da ka Kong B. Manners.