Sngewkhia u MRD, ia ki kam kaikhlaw ha Garo Hills

Delhi,24 Naiwieng:
U Myntri Rangbah duh ka Ri Dr.Manmohon Singh haka sien ba nyngkong eh u la pynpaw ia ka jingsngew khia halor ki kynrum kynram bad ki jingbym don ka jingia shong suk ha ki thain shatei Lam Mihngi khamtam ka jingkynrei ki kam lehnoh ha ri-Lum Garo. “Ka Ri-Lum Garo ha ka jylla Meghalaya ka dei kawei na ki jaka ba hap ban shimkhia” ong u Singh ha ka jingialang ba shisien shisnem ki DGP/IGP kaba la long ha nongbah Delhi ha kane ka sngi saitjain ba la dep. Nalor u Myntri Rangbah duh u Myntri ka tnad kam pohing ka sorkar India u Sushilkumar Shinde, uba la plie ia katei ka jingialang ruh u la pynpaw ia ka jinglong jinglong ka suk ka sain ha Ri—Lum Garo.
U Myntri Rangbah Duh u la ong ba ki jinglong jingman ka suk ka sain ha ka thain shatei Lam Mihngi da k ijingmih ki jingiakhih ba bunjait bad kiwei pat ki dei ki mat ba hap ban shim khia. U la ong ha ki thain ba shathie ka Assam bad ha Karbi Anglong ka la don ka jingsngew iapher jaitbynriew, ki la mih ki jingbym ia shaniah hapdeng ki riew lum bada ki bym dei riewlum ha ki thain ka Bodo, ki kam pyntriem ki seng lehnoh ha Garo, ka jingshah khnoit ki bym dei ki Manipuri ha ki thain jong ka Manipur, ki dei ki mat ba pyni ia ka jingbym don ka ia shong suk ha ka thain shatei Lam mihngi, ong u MRD. “Ngi donkam ban pynduh ia kitei ki mat ia khih, da ka jingiasngewthuh jingmutlang” ong u Dr.Manmohon singh Myntri Rangbah Duh ka Ri.
Shuh shuh u MRD u la kdew shaphang ka jingpyndonkam bakla ki khubor ban kynshoit bad ban wanrah jingkulmar ha ka imlang sahlang, da kaba ong ba ka Ri hi ibaroh kawei ka la sakhi ia ka jingpyndonkam bakla ki khubor ha ka jingjia ha Muzaffarnagar kaba la jia mynshem snem.
Lah ban kdew ba ha katei ka jingialang ki heh pulit , la ia iathir halor ka jinglong jingman ka shong suk shongsain ha ka Ri baroh kawei hynrei la kham peit bniah ia ka thainshatei Lam Mihngi, Jammu and Kashmir bad ki jaka ba shah ktah ha ki lehnoh. La kdew ruh ba bun a ki jaka ha ki thain shatei LamMihngi ki dei ki jaka ba shah ktah ha ki lehnohl. La ia kren ruh ia ka rung ka mih ki riewkiengatiar hapoh ka Ri lyngba ki kad khappud kum ka Bangladesh, Myanmar bad China.