Sngewkhia U MR, ba ki samla ba rit rta, ki iasoh HNLC

Shillong:U Conrad K Sangma, myntri rang bah ka jylla, myn hynnin ka sngi, u la pynpaw ia ka jingsngewkhia halor ka jingleit pyniasoh jong ki khun samla kiba dang rit ka rta bad ka seng kieng atiar HNLC, ha kaba u la kular ba na ka liang jong ka sorkar kan sa shim ia ki sienjam ba donkam ban tehlakam ia kum kine ki jingjia ha ka jylla.

“Ka long kaba sngewkhia shibun ban iohi ba ki khun samla ki ba dang rit ka rta, ki leit ban pyniasoh ia la de bad kine ki seng kieng atiar, hynrei na ka liang ka sorkar kan shim ia ki sien jam ki ba donkam ban pynthikna ba kum kine ki jingjia kin ym jia shuh hadien habud” la ong u myntri rangbah ia ki lad pathai khubor ha ka sngi ba ar.
La ong u myntri rangbah “Ka dei ka jingshisha kaba bun na ki khynnah kynthei bad shynrang ki leit ban pyniasoh ia lade bad ki sengkaikhlaw, ha kaba ka long kaba donkam na ka bynta ka sorkar jylla ban kan shimkhia ia kane ban ialam ia ki khynnah samla ha ka lynti ba dei”.

“Ban pynthikna ba ki khun samla jong ngi kin ym iaid sha ka lynti bym dei na ka liang ka sorkar kan dang bteng ban thaw ia ki lad ki lynti ban ia ki kam ki jam lyngba ka jingseng kam hi ia lade, ka la pynleit jingmut ban pynbha ia ka Youth Policy bad kiwei kiwei”la bynrap shuh shuh u myntri rangbah.
Halor ka jinpyniaid shakhmat ban khot ia ka seng kiengatiar sha ka miej iakren iasuk, U Sangma u la ong ba n a ka liang ka sorkar ka la long kaba kloi ban khot ia kren iasuk bad ki seng kiengatiar ha ka jylla, hynrei ki dei ban wan khlem da buh ia ki kyndon.

“Mynta la lai snem ka la don ka jingpyniaid ban iakren jingiakren ia suk bad ki sengkieng atiar HNLC, ha ki por ba la dep ki la buh ia ki katto katne tylli ki kyndon ha kaba na ka liang ka sorkar jylla ka la dep ban pynsngew ia ka sorkar India”u la ong
U la bynrap shuh shuh “Hynrei ia kine ki kyndon, kiba kine ki seng ki la pynpaw na ka liang ka sorkar India kam shem la pdiang ia kita kumta ka sorkar jylla ka la phah ktien ia ki, ba ki dei ban wan ban ia kren ia suk noh khlem kano kano ka jingbuh kyndon, kumta na ka liang ka sorkar jylla ka long ka ba kloi ban ia kren ia suk hynrei ym dei ban buh kyndon eiei”.
Halor ka jingshah byrngem ia ki nongkhaii ha ka jylla, u Myntri rangbah u la ong ba ka sorkar kan pynthikna ba kan ym don kano kano ka jingma ia ki nongkhaii ha ka jylla.

U la ong ruh ba kam don kano kano ka jingpheal jong ki tnat syntiat, ha kum kine ki jingjia bad ka tnad pulit ka long ka ba peitngor bad kaba trei shitom ha kaba ha kum kane ka jingjia ka ba la jia ruh tang hapoh ka 24 kynta ki la ioh ban kem ia kiba donkti.
Halor ka jingkynnoh ka AITC ba ym don ka shongsuk shongshngain ha ka jylla u Sangma, u la ong ba ka jylla hi mynta ka la don hapdeng ka shongsuk shong shngain ban ia nujor bad ki por ba ka synshar ka sorkar Congress kiba la kylla AITC mynta.