Nongpoh: U Bah Charles Marngar, MDC ka Mawhati Constituency, myn hynnin ka sngi u la leit jurip jurip kynsan ia ka Mawhati PHC bad ha katei ka jingleit jurip la lap ba katei ka PHC, ka don hapdeng shibun ki jingduna bad kata ka long naduh ka jingbym don Doktor, ka jingbym don bording ilektrik, ka jingbym biang ka umbam umdih, ka jingbym biang ki nos ANM lem bad kiwei ki jingduna.
Ha kane ka sngi, kaba utei u MDC u la leit jurip ia katei ka PHC, la synran da bun ngut ki rangbah shnong jong katei ka thain, kaba kynthup ia u Bah Marius Jyrwa Rangbah Shnong ka Jatah, u Bah P Kharbuki Rangbah Shnong ka Mawdiengan, Bah S Diengdoh Rangbah Shnong ka Mawhati, Bah Edmund Marten Rangbah Shnong ka Laitsyiar bad u Bah Tirot Mynsong Rangbah Shnong ka Lumniwar.
Haba iadei bad ki jingduna ha katei ka PHC, u Bah Charles Marngar, u la pynpaw ia ka jingsngewkhia halor ka jingbym biang jong katei ka jaka ai jingsumar hapoh Mawhati bad kaba la wanrah jingeh ia ki paidbah na kiba bun tylli ki shnong kiba don ha katei kak thain.
U la pynpaw ruh ia ka jingsngewkhia ban lap ba katei ka PHC kam shem la don ia u doctor u ba pura lane Medical Officer u ban peit ia katei ka PHC mynta ka ar bnai na ka daw ka jingleit pule pyntbit jong u doctor.
Namarkata, haba iadei bad kine ki jingduna ha katei ka PHC, utei u MDC ka Mawhati, u la ong ba un sa shimkhia ha ka ban leit pynsngew sha u Myntri ba dei ia ka tnad ka Koit ka Khiah.
Phi don ban ong eiei?