Sngewkhia ki Pulit ka Ri Bhoi, halor ka jingnang jyllei ki nongdih Drok

Nongpoh: Ha kaba iasnohktilang ban rakhe ia ka International Day Against Drug Abuse & Illicit Trafficking, ka ophis u Superintendent of Police, hynnin ka sngi ka la iashim bynta ban rakhe ia kane ka sngi, da kaba pynlong ia ka prokram ha shnong Iewmawlong, Nongpoh, kaba long ruh kum kawei na ki lad ban pynshai paidbah halor ka jingma kaba ap ia kito kiba la shah pynngop ha ki jingdih Drok.
Ha kane ka sngi, ki Pulit ki la pynlong ia katei ka prokram ha Iew Nongpoh, khnang ba ki longkmie longkpa kin iohsngew bad ba ki nang kumno ban sumar bad phikir ia la ki khun ki kti, khamtam eh ia kito kiba phah ban leit pule shabar.
La jan baroh ki heh Pulit ka Ri Bhoi, ki la wan ban iashimbynta ban pynshai paidbah bad kata ka long naduh u Bah Chemphang Syrti, SP ka Ri Bhoi, u Bah VDS Rymbai, Deputy SP, u Bah PS Marwein, OC ka Nongpoh PS, u Bah Anthony Kharkongngor, Rangbah Shnong ka Iewmawlong lem bad kiwei de ki riew rangbah.
Haba pynshai paidbah ha kane ka sngi, u Bah C. Syrti, u la ong, ba ki bor pulit ki sngewkhia eh halor kane ka jingkiew stet bad jyllei ki samla kiba la shah pynngop ha ka jingdih drok, ha kaba kane ka la buh ha ka jingma ym tang ia ka Distrik hynrei ia ka jylla hi baroh kawei.
Halor kito ki samla kiba la shah pynngop ialade ha ka jingdik drok, u Bah C. Syrti, u la ong ba ka shem jingeh shisha ia ki ba kin bthat na ki kynjri u Drok bad kane hi ka wanrah jingeh ym tang ia ki kmie ki kpa, kiba haiing hynrei ha ka shnong ka thaw bad ka imlang sahlang hi baroh kawei.
“Sngewsih ban iohi bad lap ba shibun ki khun samla, ki la hap ban iap khlem pat dei por tang namar duh ei lada ka jong bad kaba la pynpang nud eh ia ki kmie ki kpa bad kiba haiing ha sem” ong u Bah C. Syrti.
Namarkata, na ka bynta ban tehlakam ia u Drok, nga kyntu naduh ia ki nongialam shnong, ki seng samla ba kin iatrei ryngkat ryngkat bad ki Pulit, khnang ba kane ka jingthmu ki Pulit ban rad dyngkhong ia u Drok kan seisoh, u la bynrap.
Ha kane ka ka prokram, na ka liang ki Pulit ki la pyni ruh ia ka drama lyngkot halor ka jingshah pynngop ki khun samla ha u Drok bad kaba la wanrah ia ka jot pra ha ka iing ka sem bad imlang sahlang.