Sngewkhia ki nongkhaii ba shah kynnoh u ophisar

Nongstoiñ, 21 Lber:
Ki katto katne ngut ki nongkhaii dewiong ka thain West Khasi Hills, ki la pynpaw ia ka jingsngewkhia kaba jur halor ka jingshah kynnoh u District Mining Officer jong ka tnad DMR Nongstoin, West Khasi Hills, ba u la don kti ban iarap sei tuh ia ki Challan jong ki katto katne ki nongkhaii dewiong ka thain sha uwei u nong-khaii na Jylla Assam, khlem ka jingtip da ki trai Challan.
Ka kyrwoh khubor bala phah da ki 6 ngut ki nongkhaii dewiong ba kynthup ia u bah I. Diengngan, bah Bendrowell Hahshah, bah S. Marbaniang, K. Sangriang, R. D. Lyngkhoi bad u bah Donkupar Syiem, ka ong ba “Kumba kala paw ha ki katto katne ki kot khubor ha kine ki khyndiat sngi, na ka liang jong ngi ki nongkhaii dewiong kaba ngi im na kane ka kam khaii dewiong bad kiwei kiwei ki para nongkhaii dewiong ngim sngewtynnad ia katei ka jingshah kynnoh pyrshah ia u tei u ophisar khlem da lah ban pynshisha”.
Shuh shuh ka kyrwoh khubor ka ong ruh ba katei ka jingkynnoh ia u tei u ophisar ka tnad DMR ka long ka bym don nongrim hynrei kadei beit tang ka jingthmu pynthoh bria ia u tei u ophisar bad ia ka tnad ryngkat ia ngi lang ki para nongkhaii kumba la kynnoh.
“Lada katei ka jingkynnoh ka long kaba shisha bad lada ki trai Challan ki lap ba kila shah sei tuh ia ki Challan jong ki kidei ban mih shakhmat bad kumjuh dei ban leit ujor ruh sha kibor jong ka ain ha ryngkat ki jingpynshisha ym ban shu pynthoh bria ia ka tnad DMR kumjuh ruh ia u tei u ophisar” ong biang ka kyrwoh.