Sngewkhia ki 6 shnong, sahteng ka surok na Umjarasi sha Langpadon

Nongpoh, 29 Lber:
Ka Synjuk jong 6 tylli ki Dorbar Shnong ba kynthup ia ka Sohlait thymmai, Sohlait rim, Nartap, Langpadon, Umsawnoldhi bad ka shnong Umjarasi, ki la pynpaw ia ka jingsngewkhia kaba jur halor ka jingeh kaba la iakynduh da ki paidbah nongshong shnong halor ka jingsniew palat ka surok bad kane ka la jia ruh tang namar jingpynslem jong u Kontraktor ban pyndep ia ka surok PMGSY, kaba na Umjarasi sha Langpadon kaba don ia ka jingjngai kumba 7.50 km.
Kum ban shu ong hangne, katei ka surok ia kaba la sdang ban pyntrei naduh u snem 2014, hynrei ka long pat kaei kaei kaba lyngoh bad kat haduh mynta, katei ka surok ia kaba la dep ban mang pisa haduh T. 6 klur lyngba ka skhim PMGSY, ym shem la lah satia ban pyndep.
Haba pynpaw sha ki nongthohkhubor, u Bah P Nongshli, Chairman jong katei ka Synjuk ki 6 shnong, u la ong ba ka Synjuk ka dap shisha da ka jingsngewkhia ban iohsngew ia ka jingud jongki paidbah bad kane ka dei tang namar ka jingsniew palat jong katei ka surok.
U la iathuh ruh, kaba kham pynsohsat eh ia ki paidbah nongshong shnong ha katei ka thain ka dei haba la wanpoi ka por lyiur, ha kaba ki paidbah ki shem jingeh ha ka leit ka wan naka daw ka jingktieh jong ka surok bad kaba la dap tang da ki thliew ki syar suda.
Kumta haba iadei bad katei ka jingpynslem ban shna pyndep ia katei ka surok, ka Synjuk ka la kyrpad ruh sha ka sorkar bad ki nongmihkhmat ba kin tuklar lem bad ban bthah ia u kontraktor ba un pynstet noh ka jingpyntrei, khnang ba kan pynsuk ia ki paidbah kiba shong ba sah ha katei ka thain, u la bynrap.