Shillong: Ka Hynñiewtrep Youths’ Council (HYC) Sohïong Circle ka ai khublei kyrpang ïa ki Dorbar Shnong jong ka thaiñ kiba la ïa snoh kti lang bad ka Sorkar na ka bynta ban peit pyrman bad ban phikir ïa ka jingpur jong ka khlam covid-19.
Ym tang katta, ka Seng ka ai khublei ruh ïa baroh ki nong shnong shnong ba ki la ïa snoh kti lang bad ka Dorbar Shnong bad ruh bad ka Sorkar na ka bynta ban pynthikna ba ka imlang sahlang kan lait na ka khlam ba shyrkhei.
Kaba sngewsih pat ka long, ki don ki shnong kiba khang dam ïa ki surok paidbah da kaba khang da ki dieng ne da ki maw bad ki la bun ruh ki khep ba ki paidbah kiba don ha ka jingshitom bad kiba donkam kyrkih ban leit shim dawai sha ki Hospital ki la shah khang lad noh ha ka shnong ne ha ki maw ki dieng ba la pakhang da ki Shnong. Hooid shisien pyrkhat ka long kaba sngew dei ban khang khnang ban ïada ïa ka jing rung laitlan palat ki briew khamtam ha kum kine ki por ba don ka saw ka saiñ, hynrei haba phai pat sha kawei ka liang kane ka jing khang ïa ki surok paidbah ka long pynban ka jing pynlong langknia ïa ki para nongshong shnong ne ki para ri jong ngi kiba don ha ka saw ka sian jong ka jingshitom. Kumta, da ka mynsiem ba sngewkhia na ka liang jong ka Seng lyngba kane ka lad pathai khubor ngi kyntu jur ïa ki Dorbar Shnong ne paidbah ba phin sngewbha ban ym pakhang da ki maw ne da ki dieng ïa ki surok paidbah khnang ba kan ym wanrah ïa kano kano ka jing bym sngewtynnad ne ka jingsngewsih ha ka imlang sahlang jong ngi baroh lang.
Ha kaba ïadei pat bad ka jing don ki katto katne ki nongdie dukan ha ki shnong kiba hap hapoh ka Sohïong C&RD Block kiba shim kabu ïa ki nongthied da kaba die rem ïa ki mar bam bad kyntait ban ai cash memo sha ki nongthied kiba pan cash memo, na ka liang jong ka Seng ka la dep phah da ka dorkhas (Memorandum) sha ka Ophis jong I Deputy Commissioner East Khasi Hills District ba in leh ïa kaba donkam kat kum ka jingdonkam ki kyndon jong ka aiñ, ong ka kyrwoh ba la phah da u Samla Purningstar Shabong, President HYC Sohïong Circle.
Nga ruh nga sngewiahap ia kitei ki jingkren jong ka HYC sohiong circle bun bha ki nongdie dukan ha sohiong kiba shim kabu ha kum kine ki por khatam eh ia u khaw ki lah die palat dor namrba ki tip shai ba khlem u khaw ki briew Kim lah ban im wat lada ki die ha ka dor ka ba heh ruh ki paidbah kin thied beit ia kiba don spah kam ktah katba ia kiba pli ki rit ki ria pat ka lah ktah shaba palat.Nga kwah ba ka sorkar ba dei peit kan leh ei2 halor kane khnang ban ia ioh lem kiba duk ruh