Sngewkhia ka BJP, ba kynran ka HNLC, na ka jingiakren iasuk

Shillong:Ka Bharatiya Janata Party (BJP) ha ka sngi Palei, ka la pynpaw ia ka jing sngewkhia haba iadei bad ka rai jong ka seng Hynniewtrep National Liberation Council (HNLC) ba kan weng noh ia ka jing iakren iasuk bad ka sorkar pdeng kumjuh ka sorkar jylla, namar ba ki khlem lah ban kular ia ki jingdawa ba ka seng ka la buh ban weng noh ia baroh ki mukotduma.

U National Vice President ka BJP ba khmih ia ka Meghalaya Cr Chuba Ao ula ong “Ngi kyrpad ia ka seng kai khlaw jongngi ba kin wan sahkhmat bad imlang noh ha ka imlang sahlang ban ioh ia ka jingsuk,kum ka parti ngi kwah ia ka shong suk shong saiñ.
U President ka BJP Meghalaya Rikman G Momin ula buh jingkyrpad sha ka HNLC ba kan dang pynneh ia ka jingiakren iasuk bad ka Sorkar Jylla lane badka Sorkar Pdeng”.

Hynrei ula kyntait pat ban kynthoh eiei, la kan don ne em ka jingmap noh ia ki nongialam bad ki dkhot jong kane ka seng kieng atiar ka Rilum Khasi.
Ka seng kiengatiar ka Hynñiewtrep National Liberation Council (HNLC) ka la weng noh na ka jingiakren iasuk bad ka sorkar jylla kumjuh ruh ka sorkar pdeng ha ka sngi balang.

Ha u kyrwoh ba ki la pyllait ki la thoh ba ki pynpaw ba da jingsahnud ngi la weng noh na ka miej jong ka jingiakren iasuk bad ka sorkar la pynpaw kiba soi kyrteng ki long u bah Bobby Marweiñ Commander in chief bad u bah Sainkupar Nongtraw General Secretary, ha ka shithi ba ki la phah sha ka MHA.
Ha ka shithi ba ki la phah ha ka 31 tarik Nohprah 2023 la phah ka MHA lyngba u AK Mishra, u nongaibuit jong ka MHA ha ka thaiñ shatei lammihngi.

Ka jingweng noh na ka jingiakren iasuk ka dei hadien ba ka jingdawa ba ki la buh ka khlem urlong bad lada ki jingdawa ba ngi la dep ban buh ha khmat jong ka sorkar kim urlong bad ba kin bteng biang ban rah bad iakhun lyngba ki tiar siat.