Shillong 12 Lber: Ka seng BJP, Meghalaya ka la pynpaw ka jingsngewkhia jur halor ka kaiphod ba dang shen jong ka World Air Quality da ka kompeni Swiss Air Technology ka IQAir, kaba la buh ïa ka Byrnihat kum ka jaka kaba jakhlia tam ha ka pyrthei.
Kane ka jingpynmih kaiphod ba ka byrnihat ka hap ha ka bynta ba kadei ka jaka ka ba jakhlia tam, bad ka la wanrah kum ka jingkyndit ia uwei pa uwei u nongshong shnong ki ba ju ri bad sumar ia ka mariang.
Ka ka jylla Meghalaya kaba la ju tip ba kadei ka jaka kaba paw bad ITYNNAD tam bad ka bala pynsngew sarong ia ka jaitbynriew na ka bynta ka sawdong sawkun kaba khuid bad kaba suba.
U bah Mariahom Kharkrang, u Nongaiktien jong ka party state unit u la ong, ba “ Kane ka dei ka jingmih beit na ka jingduna ka jingpyntreikam bad ka jingbym don ki polisi kiba khlaiñ ban pyntreikam hapoh ka sain hima sima. Ki jingpynroi lypa, ki polisi ki bym treikam, ki kam khaii pateng ki bym don jingsynshar, ki la wanrah ia kane ka jingjah burom kaba khraw ia ka jylla ba jong ngi.
“Ngi khot ia ka sorkar, ban shim ia ki lad ki lynti ban pynbha mardor, ban thaw ia ki buit kiba biang da ki riew shemphang bad ban pyntreikam ia ki da kaba pyrkhing bha ban weng ia kane ka jingeh, khnang ba ki pateng ban wan kin ym iakynduh ia ki jingeh kiba jur ha ka koit ka khiah.”,la ong u bah Kharkrang.
Haba bynrap shuh shuh, u bah Kharkrang u la ong, ba “Ka sorkar,kadei ban sngewthuh ba ki rukom pynroi bym shym la thmu, kiba peit tang ia ka jingmyntoi ha ka ioh ka kot, ki pynlong ia ka jinglong kaba sniew ban kham sniew shuh shuh”.
U la ong,ba Ka don ka jingthmu ban pynkylla ia ka jaka ai jinghikai ban pynneh pynsah ia ka khyndew ha Byrnihat sha ka jaka shna karkhana, bad Kane ka dei ka jingma kaba khraw.
Ym tang ba kane ka pynlong ia ka jinglong jingman jong ka jingjaboh ha Byrnihat ban kham sniew shuh shuh, hynrei ka ktah jur ia ka lynti iaid jong ki hati, kaba ialam sha ka jingpynthut kaba lah ban jia ia ka mariang kaba la tlot lypa bad ki katto katne ki jingialeh pyrshah jong ki mrad kiba don ki jingma kiba khraw
Ka jingshim rai kloi ka sorkar ka pynmih tang ia ki jingeh kiba jur ; ha man la ka por. “Ngi kyntu jur ia ka sorkar ba kadei ban shim khia ia kane ka kaiphod bad ban jied ia ka jaka kaba biang na ka bynta ban pynlong karkhana, hadien ba la pule bniah bad thmu bniah ia ka”, la ong u hah Kharkrang.
Phi don ban ong eiei?