![](https://www.urupang.com/wp-content/uploads/2024/03/DSC00678-6.jpg)
Shillong:U Lamphang ka Ïingdorbar thawaiñ ka jylla u Thomas A Sangma, ha ka sngi Thohdieng, ula leit jurip biang bad lum ruh ïa ka jingïalang ban khmihbniah ïa ki kam halor ka jingpyntrei ïa ka ïingdorbar Thawaiñ ba thymmai ka Jylla ha Mawdiangdiang.
Ha katei ka jingïalang la ïadonlang u Myntri Rangbah ka jylla u Conrad Sangma, ki Symbud Myntri Rangbah ka jylla u Bah Prestone Tynsong bad u Bah Sniawbhalang Dhar, u Myntri ka tnat Bording u AT Mondal, u Myntri ka tnat PHE u Marcuise N Marak, ki Contractor, Design Associates bad ki heh ophisar na ki tnat bapher bapher.
Hadien ka jingwan jurip bad ka jinglum ïa ka jingïalang bishar kam, u Lamphang ula pynpaw ïa ka jingsngewhun ha kaba ïadei bad ka jingïaid ki kam ki jam jong ka jingtei ïa ka Ïingdorbar kaba thymmai.
Ula ban jur ba dei ban pynurlong ïa ka jingthmu ban pyndep ïa kane ka jingtei hapoh une u snem bad da ka jingkhmih lynti ban ïoh pynlong noh ïa ka Dorbar ha kane ka Ïingdorbar bathymmai jong ka jylla.
Nalor kane, u Lamphang ula ban jur ruh ïa ka jingdonkam ban peit ïa ka jingshngaiñ bad ban bud ryntih ïa ki kyndon ha ka rukom tei bad ban shna thikna khlem da ïapeiñ ïa ki lada jingïada.
Ula pynthikna ba katba ki dang ïaleh ban pyndep ha ka por kaba la buh, kam dei ban don pat kano kano ka jingpynbor ïa u contractor bad design associate kaban buh pat ha ka jingma ha kaba ïadei bad ka jingshngaiñ.
U Lamphang ula pyntip ruh ba u Myntri Rangbah, ki Symbud Myntri Rangbah kila pynpaw ïa ka jingsngewhun ha kaba ïadei bad ka jingïaid shakhmat ka kam jong ka jingtei ïa ka Ïingdorbar.
Nalor kane, ula pyntip ba la dep ban thied lut ïa baroh ki tiar kiba donkam ha ka Main Central Hall bad ula khmih lynti ba ki kam ki jam baroh kin long kiba ïaid beit ïaid ryntih ha ka jingpyntrei ïa kane ka project.
Phi don ban ong eiei?