Sngewbha mab lem ka khajna 50%, kyrpad ka MARODA ïa ka Sorkar

Shillong:Ka Motphran Auto Rickshaw Owner & Driver Association (MARODA) ha ka jingïalang kaba la pynlong ha ka 4 tarik mynta u bnai ha shwa ban pynthymmai ïa ki nongkitkam ka la shim ïa ka rai ban kyrpad ïa ka Sorkar jylla ban mab ïa ki khajna (Tax) la kumno kumno 50%.

Katei ka jingkyrpad jong ka seng ka long hadien ba kiba bun na kiba ñiah auto ki shem jynjar ban siew ïa ki khajna jong une u snem bad namar ba lah kiew dor lut nadong shadong, kumjuh ruh ki Tax ki la kiew dor ha ryngkat lang bad ki kuna.

Katkum ka khubor ba la phah da u President bad secretary Bah Evandul Marbaniang bad Bah Thrangbor Sawian ki la kyrpad ïa ka Sorkar jylla ba kan sngew synei ïa kiba ñiah auto rickshaw ban mab ïa ki khajna 50% namar ka kamai jong ki ruh ka long kumta da kaba kamai pud sngi laitnoh mynta ba la pynlait lut ïa baroh ki kali kamai bad bun kidei kiba wan na ki longïing baduk bad jynjar bad ki shem jynjar ban siew khajna jong une u snem bad ba la kiew dor nadong shadong bad ki khajna ruh ki la kiew dor ha ryngkat ki kuna.

Ha kajuh ka jingïalang ka seng ka la ïoh ruh ban pynthymmai ïa ki nongkitkam na ka bynta u snem 2022 haduh 2024 bad ki nongkitkam ki long President Bah Evandul Marbaniang, Vice President Rijied Rynjah, secretary Thrangbor Sawian, Assistant secretary Dening Nongrum bad Finance secretary Nevalshal Nonglang.
La jied ruh ïa 12 ngut ki Executive member, 15 ngut ki volunteer kiban peit bad pynïaid ïa ka Stand ha Motphran bad Mawlai. Ka seng ka la buh ruh 2 ngut ki riew Rangbah ban long ki nongai buit ba kynthup ïa u Bah Arwan Tariang bad Bah Alantry Dkhar, ong ka kyrwoh na u Bah T. Sawian, Secretary.