Sngew phylla u ma Shitlang Pale, ban iohi ia ka jingmih khubor lamler ha ki Social Media

U ma Shitlang Pale uba dei u MLA jong ka 5 Sutnga-Saipung u la sngewkyndit bad sngew phylla ban iohi ia ka jingmih khubor lamler ha ki Social Media kaba ong ba “Pur ka khubor ba yn rung BJP u ma Shitlang Pale”

Na ka liang jong u ma Shilang ula iathuh ba haduh mynta um pat don kano kano ka jingmut nalade ban leit rung sha ka Party BJP bad ban iakhun ia ka elekshon 2023 na katei ka Party. Um tip ruh nangno kine ki nongpynmih khubor ha ki Social Media (Facebook) ki ioh ban thoh ia kum kitei ki jait khubor kiba long pyrshah ia ka jingsngew jong u briew shimet.

Na ka liang jong u ma Shitlang Pale u pynshai da kaba ong “Ba na ka liang jong nga, ngam don bynta ne don jingiadei ei ei bad ka Party BJP, hynrei kane ka jingpynmih khubor ka long tang ban pynthoh bria ia nga, kaba dei ruh ka buit sianti jong no re jong no kiba kwah ban pynkulmar jingmut ia ki nongkyrshan jong nga ha kane ka elekshon 2023 ban sa wan”.

Kumta na ka liang u ma Shitlang ula kyntu ia baroh ki nongkyrshan jong u na ka 5 Sutnga-Saipung ba kim dei ban sngap ia kum kine ki khubor khlieng tyngab, kiba kwah ban pynsniew dur ia ka jinglong nongmihkhmat jong u, hynrei lada kino kino kiba kwah ban tip ia ka jingshisha ki lah ban kynjoh ktien beit tang na u hi.