Sngew kyndit ka MEPA, ia ka khubor lamler ia ka dkhot jongka

Shillong: Ka Meghalaya Editors’ and Publishers’ Association (MEPA) ka pynpaw ia ka jingsngew kyndit bad jingbymsngewtynnad jongka ia ka troll kaba la pynsaphriang ha ki social media da ki briew kiba ym lah ban tip kiba thmu ban pynphriang ia ka khubor lamler pyrshah ia ka dkhot ba rangbah jong ka MEPA, ka Kong Patricia Mukhim.

Kane ka troll kaba don ka jingpathai khubor ba shu thok ka la pynbna ba ka Kong Mukhim, kan long ka kyrtong ka All India Trinamool Congress ha ka election Dorbar Thaw Ain ka ban long ha u 2023 ka long kaei kaei kaba sngew jli bad kaba ym lah ban pdiang. Ka MEPA kam ju poi pyrkhat ban kin mih kum kine ki troll kiba pynthoh bria ia ka nongthohkhubor.

Ha kaba iadei bad kane, na ka liang ka MEPA ka kyntu jur ia ka Cyber Crime Cell jong ka Meghalaya Police ban thwet ia ki nongpynmih ia kane ka troll bad ban pynshitom ia ki katkum ka ain khnang ba kum kine ki jingpyndonkam bakla ia ka social media kin ym jia shuh hadien habud, ong ka kyrwoh na U bah John W. Thabah, General Secretary, MEPA.