Shillong: Ka Executive Committee jong ka Synjuk Nongsynshar Shnong Bri Hynniewtrep (SNSBH) kaba la shong jingialang myn hynnin ka sngi ka la iakren sani bha halor ki katto katne ki mat ha kaba iadei bad ka jingsahteng jong ka jingweng noh ia ka jingpyntreikam ia ka Meghalaya Building Bye laws.
Ha ka kyrwoh, u General Secretary ka SNSBH u bah RL Blah u la ong ba ka Synjuk ka dap da ka jingsngewkhia kaba khraw, ba kane ka kam kam poi satia shano shano. Kumta ha kaba iadei bad kane, ka Synjuk sa shisien pat ka la rai ban leit ia kynduh ia u Myntri ka kam pynroi sor ka Sorkar Jylla, u Bah Hamlet Dohling ryngkat ka jingthoh ban pan jingshai halor kane ka mat.
Ka Synjuk ka la iakren ruh halor ka jingsahteng jong ka Village Administration Bill kaba dei ka Bill ban pynkup bor ia ki Dorbar Shnong hapoh ki pud ki sam ka Khasi Hills Autonomous District Council, khamtam ia ki Hima ki bym pat don la ki Act bad ki Rule la jong. Ka Synjuk hadien ba la pyrkhat bniah bha, ka la rai ban thoh sha u Chief Executive Member jong ka Khasi Hills Autonomous District Council, u Bah H.S. Shylla ban pan jingshai halor kane ka mat.
Ka Synjuk ka sngewkhia shikatdei eh ha kaba iadei bad kitei ki phang namar kitei ki long ki mat kiba ka Synjuk ka la shim khia naduh ba sdang. Kumta ka Synjuk ka kyrpad ia ki bor ba dei khmih ban shim khia bad peit ba kine ki ar tylli ki mat jingdawa; ka Village Administration Bill bad ka MUDA kin beit noh kham kloi na ka bynta ka bha ka miat jong ki paidbah.