Sngew khia ka Deborah ba dih drok ki khynnah 6-7snem

Shillong, 26 Jylliew:
Ka Myntri jong ka Social Welfare ka la plie ia ka jingiakynduh halor ka jingpynshah ia ki jingpyndonkam ia ki drok bad ka jingkhaii beain kaba la long mynta ka sngi ha Shillong.
Haba kren hynne ka sngi ha kane ka jingialang kaba ka pynlong da ka social welfare bad ka regional resources centre na Kohima, Nagaland bad ki NGO ha kane ka jylla, ka Deborah ka la ong ba donkam ban pyntreikam thikna ia ki prokram na ka bynta ban wanrah ia ka jingmyntoi jong ki briew kiba donkam shisha ha kane ka bynta.
Ka la kyntu ia ki NGO kiba shim ia kane ka lyngkor ba kin leit sha ki skul bad ki nonghikai ban ai jingshai halor ka jingdonkam ban pynsngewthuh ia ka jingma na ki drok. Donkam ban pynlong ia ka jinghikai ban pynsngewthuh ia ki khynnah skul bad kumno ka jingktah kaba sniew kaba mih na ka jingpyndonkam ia ki drok.
Ka la pynpaw ia ka jingsngew khia ia ka jingkharoi ki nongpyndonkam drok ha kane ka jylla bad kane ka la long kaba ma shisha namar ba wat ki khynnah ba 6 haduh 7 snem ki la nang ban pyndonkam drok katkum ka jingkhein kaba la ioh ha u snem 2008-09, la ong ka Deborah.
Shwa ia kane, u Dr P Ngully u direcror ka Regional Resource Centre u la batai ia ka jingmih ka jingkyrni drok ki samla. Ki drok ki la ktah jur ia ki samla bad ki pynjot ia ka jingim jongki ha ka lawei bad donkam ban tehlakam ia kane.
Ha kane ka jingiakynduh la iadon lang ki NGO bapher bapher kiba iadon bynta ha kane ka kam.