Sngap jur U Mukul halor ka Innerline Permit Kwah U MR, da ka FA & TA ha ka Jylla

Shillong, 4 Naitung:
Ka sorkar ka eksamin ia ka jingdonkam ban pyntreikam ia ka ain nongwei ne ka “Foreigners Act” (FA) bad ka ain “Tenancy Law” (TA) ban pynkhlain ia ka jingiada ia ka jingwan rung briew nabar sha kane ka jylla Meghalaya.
U Myntri Rangbah ka jylla u Dr. Mukul Sangma u la iathuh ha ki nongthoh khubor mynta ka sngi, hadien ba la wai ka jingialang ba la bthah ia ka tnad Labour bad ka tnad Law ka jylla ban pule bad eksamin ia ka jingdonkam ban thaw ain da ka sorkar jylla khnang ban bynrap shuh nalor ki ain ba la don lypa ban tehlakam ia ka jingwan rung ki briew sha kane ka jylla.
Ka tnad Law bad ka tnad Labour kin iashong jingialang la shem taiew ban eksamin ia kane ka ain Foreigners Act.
Ka jylla Meghalaya ka don ka jingjrong u pud haduh 465.387 km bad ka Bangladesh. U Dr Mukul u la ong ba ka long kaba donkam ban pyntreikam ia kane ka ain Foreigners Act. “Ki kyndon ha kane ka ain ka long kaba iahap bha ia ka jylla Meghalaya”.
Ka jingwan tuid ki briew sha kane ka jylla la pynsngew bad la ju khih man ka por na ki seng bhalang bad wat ki MLA ruh.
U Dr Mukul u la ong ba la bthah ia u Chief secretary ban pynlong ia ka jingialang halor kane bad la bthah ruh ban pynkhreh ban thaw ia ka Tenancy Law.
U la ong ba ka Tenancy Law kan iarap ban pyrkhing ia ka jingwan tuid ki briew nabar kiba long artatien ha kaba ki trai iing kin iadon bynta lang ban peitngor ia kane.
“Ka long kaba donkam ban pynshisha ia ka jinglong jong ki briew kiba wan nabar bad ka jingthmu ka long ba ki trai iing kin dei ka atiar ban peit ia ki briew kiba wan sah wai”, la ong u Dr Mukul.
Halor ka jingkylli la ka sorkar kan pyntreikam ne em ia ka Inner Line Permit lane ka Three Tier Card, u Dr Mukul um treh jubab beit hynrei u la ong, “Ngi kwah ban thaw ia ki ain kiba biang ban iada ia ka jingwan tuid ki briew kiba nabar”.