Sma iwtung ka Wah Riwiang, ba leit bar pathar ki nongtrei

Nongstoin, 22 Jylliew:
Ka karkhana sain nar-rod kaba la tip kum ka Ferroy Alloy kaba la don la kumba saw-san snem, ha ka Shnong Riwiang kaba jngai kumba 17 kilomitar na Nongstoin, kaba hap hapoh ka Maw shynrut Konstitwensi, dang ha ki khyndiat bnai jong u snem ba la lah; la lap ba ka jingpyntuid jaboh na katei ka karkhana ka la pynlong syndon ia ka Wah Riwiang ban kylla rong saw.
Wat haduh mynta katei ka karkhana sain nar rod ka dang iai bteng hi ia katei ka jingleh jaboh kaba la pynmih ia ki jing sma iwtung ia ki paidbah kiba sah ha katei ka thain, namar ka jingleit bar pathar jong ki nongtrei katei ka karkhana sha ki madan madiah.
Ia katei la pynthikna da u Samla Biangbor Sangriang, President KSU Kriangrin Area Unit ha ka jingleit jurip kaba kynsan jong ka Seng  na ka jingujor jong ki paidbah kiba sah marjan katei ka karkhana. Ha katei ka jingleit jurip kaba kynsan ka seng ka la lap shisha ia katei ka jingleit painkhana pathar jong ki nongtrei hangtei, namar ki jingsniew noh ki painkhana bad don ruh kiba la dap bad tuid noh sha kylleng ka madan jong katei ka jaka.
Na ka liang jong ka seng kala pynrem jur ia ka jingleh jong katei ka karkhana namar ka jingsma bad jing ijli kaba la palat, kumjuh ka seng ka pynrem ruh ia ka jingbym khein dor katei ka karkhana  ia ka jingkoit jingkhiah jong u paidbah basah sawdong katei ka jaka bad ka long ruh kum ka jingleh pyrshah ia ka jingkhuid jingsuba ia kaba ka sorkar kala thmu ban rat diengkhong noh ia katei ka jingleitbar pathar.
Ym tang kata ka seng kala lap ruh ia ki jinglum thup pathar ia u dewiong ba la dep thang da katei ka kompani ha kaba ka khlem da ker ban iada na ka jingtuid sha ka wah Riwiang kaba don marjan katei ka karkhana kaba lah ban ap jingma biang ia katei ka wah namar katba wan u slap u tei u dewiong bala dep thang u tuid suki suki sha katei ka wah bad khlem pep hadien ba u tei u dewiong un sa pynlong bih ia katei ka wah.
U samla Biangbor u la iathuh ba ha kaba iadei bad katei  na ka liang jong ka Seng kan sa leh ia kaba donkam bad kumjuh ban leit ia kynduh ruh ia ki bor ba dei peit ia ka mariang.