Slem ka Water Policy ba hap rung ha man ki tnad sorkar

Shillong, 13 Nailur:
Ka jingthmu ban pyndep ia ka Water Policy kan shim por shwa namar ba mynta kane ka policy kan hap ban leit rung shwa ha man ki tnad sorkar ban bishar ia ka, ka biang ne em. Ha ka jingshisha kane ka policy la dep phah sha man ki tnad mynshwa hynrei namar bym pat hun, la phah biang ba kan leit rung ha man ki tnad sorkar shwa ban shim ia ka rai kaba khadduh.
“Ngi la hap ban phah biang sha man ki tnad ia kane ka policy, ngi kwah ban pule bniah ia ka namar ba don ki jingai jingmut shuh shuh ban bsuh ha ka” la ong uwei u heh sorkar ha kane ka sngi Palei.
La iathuh ba ka sorkar kam pat kwah ban shu tynruh wut wut ia kane ka policy namar ba ka long kaba donkam eh na ka bynta ban iada ia ki kynja ba im.
“Ngi la sngew kmen ba ki riew shimet, ki kynhun bapher bapher ki la
wan shakhmat ban ai jingmut ia kane ka policy” la ong u heh sorkar.
Haba kylli ia ka jinglong jong ka policy, une u heh sorkar u la ong ba la dep ban lum ban lang ia baroh ki jingai jingmut jong ki paidbah nalor ki jingai jingmut na ka sorkar jong ki tnad sorkar bapher bapher.
Ha kajuh ka por, u la ong ba ka sorkar jylla ka la iateh bad ka German International Cooperation (GIZ) ban thaw ia kane ka State Water Policy.
“Ngi la khot lang ia ka GIZ kum ka stad ka jhad ban thaw ia kane ka policy kaba donkam eh kaba iadei bad ka jingiada bad pynneh ia ki kynja baim ha ki um bad ki wah”, la ong shuh shuh une u heh sorkar.
Katkum ka jingong une u heh sorkar, kane ka kynhun na German ka la don bynta ha kiba bun ki ri jong ka pyrthei ban iarap ban thaw ia kane ka policy.
“Ka kynhun na German ka la wanrah ia ki stad ki jhad na ka pyrthei kiba tbit ha kane ka liang bad ki la ai jingmut kumno ban thaw ia kane ka policy kaba khlain bad kaba bit ba biang” u la ong shuh shuh.
Ia mynta ka sorkar ka dang shu dep ban lum ban lang ia ki jingai jingmut halor kane ka policy bad shen kan sa pyndep ia ka kam.