Slem ka jaka ot doh ha Mawlai ba thur mur ka MeECL

Shillong,20 Nailur:
La kynnoh ba ka jingslem ban pyntreikam ia ka jaka ot doh kaba don ha Mawlai Mawiong ka dei na ka daw ka jingle thur thur ka tnad MeECL kaba la pynkhein ia ka jingiateh hapdeng jong ka bad ka tnad ri jingri. Ki tyllong khubor kiba la ioh lum la iathuh ba ka MeECL ka la buh da u Transformer uba rim ha katei ka jaka ot doh kaba don ha Mawlai katba katkum ka jingiakut bad ka tnad Animal Husbandry and Veterinary pat ka long ba ka dei ka tnad ka dei ban buh da u Transformer uba thymmai.
La iathuh ruh ba ki ophisar ka tnad ri jingri ki la kyndit ban lap ba ka MeECL ka la pyndait da u Transformer uba rim kaba ki la lap ha ka por ba ki leit jurip ia katei ka jaka ot doh. Ki lad khubor ki la iathuh ruh ba ka tnad ri jingri ka la dep siew ia ka pisa sha ka MeECL ha u iaiong mynta u snem bad ka dor ka long katkum ka jingshong dor u Transformer thymmai pynban katei ka tnad ka la pyndait da uba rim.
La iathuh ruh ba ka tnad ruh jingri ka la hukum ia ki Enjiniar jong ka, ba kin leit ia kren sha MeECL ba ka dei ban weng noh ia utei uba rim bad ka dei ban pyndait noh da uba thymmai hapoh ka jaka jong katei ka jaka ot doh. Nalor kata la ong ba katei kam dei ka jingiakynduh kam kaba nyngkong hapdeng ka tnad ri jingri bad ka tnad MeECL hynrei kham mynshuwa ruh la iathuh ba ka la don ka jingiatyngkhuh kam kaba na ka por shi ka por ba ka tnad ri jingri kam sngewhun ia ka rukom treikam ka MeECL.
La ong ba wat hadien ba ka tnad ri jingri ka la phah jingthoh ban pynkynmaw na ka por sha ka por ban pyndait noh ia u Transformer ha katei ka jaka ot doh pynban ka tnad MeECL ka la wan ban pyndait hadien san bnai ba la dep thoh bad ka la leh ia katei ka kam ruh hadien ba ka tnad ri jingri ka la dep ban siew lut ia ka pisa ba donkam, hynrei la ong ba wat hadien ba la ap la san bnai bad ba la dep ban siew lut ia ka pisa pynban ka MeECL ka dang leh thur mur.
Katkum ka jingiateh la ong ba ka MeECL ka dei ban buh ia u Transforker uba kit 500KV, bad ka jijngdonkam da u Tranformer uba khlain la ong ba ka dei namarba ka ka jaka ot doh kan bam bording kham bun. Lah ban kdew ba katei ka jaka ot doh ha Mawlai ha ka shisngi kan lah ban ngiam kumba 160 tylli ki mrad heh , 240 tylli ki sniang bad 240 tylli ki mrad kiba rit kum ka blang . Lah ruh ban kdew ba ia katei ka jaka ot doh ha Mawlai la pyntrei da ka Rapsang Group of Companies bad ka Real Growth Company na Chennai.