Shillong: Ka skulbah ka rep ka riang ne ka Central Agriculture University (CAU) kaba dei ban seng ha kane ka jylla ha Kyrdemkulai, ka slem namar ba ka sorkar jylla kam pat ai jaka ban shna ia ka Administrative Building ha Umiam, Ri-Bhoi.
Katkum ka jingtip RTI ba la ioh, la pyni ba ka sorkar ka la pynslem ban ai ia kane ka jaka kaba dei jong ka MeECL kaba heh 40 akar ban shna. Ha ka jingshisha ia ka jaka pule, la dep ban ioh ia ka jaka ha Kyrdemkulai, Ri-Bhoi kaba heh kumba 200 akar.
“Ka jingleh lahe lahe ne suki ka sorkar jylla, ka lah ban buh jingma wat ban duh syndon ia kane ka skulbah”, la ong u bah A Dkhar uba la ioh jingtip da ka RTI.
Katkum ka RTI, ha u snem 2010, ka Parliamentary Assurance ka la pynthikna ban don ka CAU ha dong mihngi ba kynthup ia ka Meghalaya, ban pyllait noh na ka Imphal Central Agriculture University.
U chairman ka DARE u Dr S Ayyeppan uba long ruh u DG ka IACR ha ka 28 tarik Nailur, 2015, u la ong ba dei ban pynsted ia kane ka kam ban sdang noh bad, ka sorkar jylla ka la ai ia ka jaka ha Kyrdemkulai kaba heh 200 akar ba la iasoi hapdeng u Joint secretary ka tnad ka rep ka riang ka jylla bad u Dr SN Puri u Vice Chancellor ka Imphal Agriculture Univiersity ha ka 14 tarik Nailur, 2014.
Hynrei ym lah ban tip namar ki bor ba sha lyndet, la pynslem ban aiti sa ia ka 40 akar ia ka jaka kaba don ha Umiam ban shna ia ka Administrative Headquarter bad kane ka la sahteng haduh mynta namar bym shim khia ka sorkar jylla.
Phi don ban ong eiei?