Skhem ka kam ki nongtrei ba shu thung sop sop

Shillong,21 Nailar:
La ju ioh sngew ia ka jingkhnium jong ki paidbah ha ki katto katne tylli ki shnong bad la iohi ruh ha ki kot khubor ha ki snem ba la dep ha kaba la lah ban sei madan ia ka jingthung kam sop sop dano re ia ki briew lajong khlem ka jingpynbna baiar. Ka kam ha Khrang PHC bad ha Mawkliaw PHC ka dei ka ba la paw shynna bad ka bym lah shuh ban buhrieh ba la shu thung kam sop sop ha kitei ki ar tylli ki PHC katba ki nongshong shnong pat kim bna eiei bad kyndit shiphang por shuwa ban plie ia kitei ki PHC ki la mih pynban ki jingong ba ym donkam shuh kaba lait, hynrei don katto katne tylli na ka bynta ki Technical staff.
Haba la pyrshang ban twad jingmut na ki rangbah shnong namar ym shym la iohi ban don wat tang iwei ruh i trai shnong ban ioh kam rit kam ria ha kitei ki PHC kaba lyngngoh kaba u Rupang u la ioh sngew na ki ka long ba ki la ong ba ki la wan ia kynduh ba heh ba hain kiba peit ia ka koit ka khiah hynrei ka jubab pat jong ki ka shu sah ha ka um dum namar ki la wan phai shnong da ka jingbymshai ha kaba ki la ong ba la shu kyllain ki jingkren ki ba laiphew jait.
Hynrei kaei kaba la paw shai mynta ka long ba kitei ki nongtrei ba la shu thung sop sop dano re mynta ki la skhem syndon sbak bad ym lah ban pynkhih shuh ia ki. Kane ka jingshai ka la mih na ki jingkren jong u Myntri ka koit ka khiah ka jylla ha ka jingplie ia ka PHC kaba don ha ka shnong Khrang hakaba u la ong “Ia kaba la dep la dep , ngim dei ban pynduh ia ka hok kaba ki la ioh bad kaba sah ka long ba ki paidbah ki dei ban ai kti lang ban wanrah ia ka PHC kaba jop” watla kitei ki jingong jong u Myntri ki long ha ka shnong Khrang haba pynpaw ba ka jingsngewbriew kam shah ban pynduh ia ka kam kaba ki la im ja la shisnem shiteng hynrei la sngewthuh ba kitei hi ki juh ki jingong kin iaid sha manla ki shnong haba don ka jingplie PHC ne kino kino ki Health Centre kiba la shu thung sop sop ia ki nongtrei.
Kum ban shu pynkynmaw ba ha Khrang bad ha Mawkliaw PHC la dep ban thung kam lypa naduh u 2010 bad ki nongtrei hangtei ki la trei kumba shisnem shiteng eiei, ha kaba na ka liang jong u Bah Titos Chyne MLA Sohra u la thet kti ha katei ka kam thungkam thungjam.
Lah ruh ban pynkynmaw ba hangne ha Shillong kita ki samla kiba la pass ha ka Grade IV ki la iakhih khru shi khru ban dawa ia ka hok jong ki katba ha lyndet pat la thung shaid shi shaid ia ki nongtrei ki ba la shu thung sop sop da ki politishian ne dano re.