Siew U Arnab Goswami, T.40 lak sha u heh ka BARC, ban kyntiew ia ka TRP jong ka Republic Channel

U Partho Dasgupta, uba dei u heh duh barim jong ka BARC India, u iathuh ba ula ioh pisa 12,000 US dollar, na U Arnab Goswami, uba dei u editor in chief jong ka Republic TV, na bynta ki jingleit kai sngewbha jongu bad nangta sa ka pisa kaba T.40lak, ha ki 3 snem bad katei ka dei, na ka bynta ban pynheh ia ka TRP jong katei ka news channel.

U CEO barim jong ka Broadcast Audience Research Council (BARC) India, u la iathuh ia kitei ki jingjia, ha ki pulit ka Mumbai, ha kaba ki pulit ka Mumbai, ki la sei ia ka kaiphod, ha ka 11tarik mynta u bnai.

U Partho, u iathuh ba ula ia kynduh ia U Arnab, naduh u snem 2004, ha ka por ba ki ia treilang ha Times Now bad hadien kata, ula trei noh ha ka BARC, kum U CEO, ha u snem 2013, katba U Arnab Goswami, ula pynmih ia ka Republic Chennal, ha u snem 2017.

Ha u snem 2017, U Arnab, ula ia kynduh ia U Parto ha St Regis hotel, Lower Parel bad ai pisa 6000 dollar, na bynta ka jingleit jong U Partho sha France bad sha Switzerland; nangta ha u snem 2019, U Arnab Goswami, ula siew biang 6000 dollar, na bynta ka jingleit jongu sha Sweden bad sha Denmark. Ha u snem 2017, ula siew ruh da ka pisa T.20lak bad kumjuh ha u snem 2018 bad 2019, ha kaba u siew mar shiphew lak, ha kawei ka jing ia kynduh, ong U Partho, ha ka jing jubab ia ki pulit jong ka Mumbai.