Siew pisa Digital sha Thomas Jones College

Jowai, 8 Jymmang:
Ka Thomas Jones Synod College, Jowai ka la shim ia ka rai ban nym pdiang shuh ia kino kino ki jingsiew jong ki samla pule markti da ka pisa hynrei la bthah ia ki ban siew da ka Digital Payment.
Ia kane la pyntip da u Principal katei ka College haba kren ha ka Awareness Program ban batai bniah kumno ban pyndonkam ia ka Digital Bank sha ki samla pule jong katei ka College.
U Dr. RR Khar kongor, Principal ka College u la ong ba naduh ka Semester ka ban sa wan ka College kan pdiang tang da ki Digital Payment na ka bynta ki samla pule BA bad BCom ha katei ka College. Ki heh na SBI Bank Jowai, kiba kynthup ia u Chief Manager u ST Ngaihte bad u Officer jong u, u Debraj Baruah ki la wan ban ai jinghikai kumno ban pyndonkam ia ka Digital Banking. U Ngaihte u la ong ba ha ka por ba ki bank ki la sdang ia ki ATM bun kibym kwah pyndonkam hynrei mynta la jan baroh ki pyndonkam ATM lut.
“Ha kane ka juk Teknoloji ba mynta, phim donkam shuh ban pyllut por ban leit sha bank ban leit sei pisa haba thied ne siew, hynrei phi lah lut ban leh ia kane lyngba ka Smart Phone jong phi”, u la ong Ka don ka App SBI Buddy- kane ka App kan iarap ia phi ban siew pisa haba thied ticket rell, aeroplane, ticket Cinema, haba leit bam sha Restaurant bad kiwei kiwei ki jingsiew. Katba ka SBI Collect pat kan long na ka bynta ban siew ia ka Bai College, Bai Skul, bai Hospital bad kiwei kiwei. U Debraj u la batai shuh shuh halor ka App SBI Quick bad kiwei kiwei kiba donkam bad ka Digital Banking.