Mumbai: Ki runar ba triem jong U Lawrence Bishnoi, ki la phah biang ia ka jingbyrngem ban pyniap noh ia U Salman Khan, uba dei u actor ba paw jong ka Bollywood, hynrei lada jia ba u kwah ban lait na ka jingshah pyniap, u dei ban siew noh mar mar ia ka T.5klur, ban ia khuid noh ia katei ka jingthmu ban pyniap kaba la thmu la slem bha, da katei ka kynhun kitei ki runar.
Katei ka kynhun, ka la phah mesej sha ki pulit pyniaid kali ha Mumbai bad la kren shai ruh, ba lada U Salman, um siew noh ia katei ka pisa, kumta ki la ong ba ka jingiap jongu lei, kan long kaba kham triem palat, ban ia kaba ki la pyniap ia U Baba Siddiqui, uba dei u myntri barim jong ka sorkar Maharashtra bad u paralok ba iajan bad U Salman Khan.
“Lada U Salman, u kwah ban dang im bad ban pynkut noh ia ka jingiakynad bad U Lawrence Bishnoi, kumta un hap ban siew T.5klur. Um dei ban shim sting ia kane ka jingdawa, namar ba ka jingiap jong U Salman khan, kan kham triem shibun, ban ia kaba u iap ua Baba Siddiqui,” ong ka jngthoh.
Lah ban pynkynmaw, ba U Siddique (66), uba dei u heh duh jong ka seng NCP bad uba iajan bha bad U Salman Khan, ula shah siat iap, ha ka 12tarik Risaw, ha khmat ka ophis jong u khun jongu, u Zeeshan Siddique ha Bandra, Mumbai. Haduh mynta, ki la don 4ngut kiba la shah kem. U Shubham Lonkar, uba dei uwei na kiba donkti ha katei ka kam runar, u kam, ba katei ka jingpyniap, ka dei kaba la don bynta da ki runar jong U Lawrence Bishnoi.
Phi don ban ong eiei?