Siew khajna shwa, sa kit dewiong, ong ka komiti “Bun ki trai dewiong, ki ai jingkhein thok”

Shillong, 1 Nailur:
Ka komiti ba la thung da ka National Green Tribunal, ha ka 1tarik Nailar 2014, ka la pynmih ia ka rai jong ka, mynta ka sngi, ha kaba iadei bad ka kam ban pyniaid iew ia u dewiong.
Haba shim ia katei ka rai, ka komiti ka kdew ruh ba katba kum ka jingkwah jong ka NGT, ba dei ban don ki jaka thew dewiong, ha ki jaka kiba mih ki trok napoh ka Jylla; hynrei, la iathuh ba ia mynta, ki don tang lai tylli ki jaka thew,kiba treikam bad kitei ki kynthup ia kaba ha 7mer (Pasyih), ha ka NH-44 ha West Jaintia Hills District; ka Sarangma ha ka NH-62 jong ka North Garo Hills District bad ha Umling jong ka NH-40 ha Ri Bhoi District bad ka dei tang ka jingkieng ha Umling, kaba dei ban mih bad ban rung sha ka Jylla, katba ym shym don jaka thew satia, ha ki 10tylli kiwei pat ki jaka rung jaka mih.
Ka jingkynthoh shuh jong ka komiti, ka long ba mynta u dewiong u jhieh bad kumta, ka jingthew, kaba mih na ki jaka thew, kan nym long satia kaba biang bad kumta, halor katei ka phang, ia ka jingthew, yn shem da ka jingdon jong u dewiong ha ka cubic metre x 0.88, kaba la pynkylla ia ka jingthew sha u dewiong uba rkhiang.
La iathuh shuh shuh, ba ia ka jingkhein ia u dewiong ha West Khasi Hills bad South Garo Hills, ym shym la lah ban pyndep ha U Nailar ba ladep, namar ka jingjur slap palat ha kitei ki ar tylli ki District.
Ka komiti, ka iathuh ruh ba ki trai dewiong, ki ai ia ka jingkhein kaba shu thok, ia ka jingdon dewiong jongki, wat haba kim don dewiong ruh bad don kiba kam kham bun, ban ia kaba ki don ha ka jaka buh dewiong.
Ka komiti, ka la rai namarkata ban pynkit noh ia u dewiong, uba la dep tih bad uba la dep thew na ki District kiba kynthup ia ka East Jaintia Hills, West Jaintia hills, East Khasi Hills, South West Khasi Hills, East Garo hills bad West Garo Hills.
La iathuh ba mar ia pynmih ia katei ka hukum, ki trai par, kin ioh por khadsaw sngi ban siew ia ka khajna sha ka sorkar Jylla bad katba kum ka jingdon dewiong jongki.
Mar ia dep siew ia katei ka khajna, ka tnat Director of Mineral Resources (DMR), kan sdang ban ai jingbit ban kit noh ia ka mar bad ba dei ban pyndep hapoh lai bnai, katba kum ka hukum jong ka NGT, kaba 9tarik Jylliew 2014 bad kawei kawei ka jingai jingbit, kan treikam, na ka bynta 30sngi bad kawei kawei ka trok, ka dei ban kit ia ka mar, kaba hapoh 9ton.