Siew bai lutksan shwa, sa trei ia ka surok arliang, ong ka Wapungskur ia ka NHAI

Shillong, 1 Lber:
Ka Dorbar Shnong Wapungskur East Jaiñtia Hills District ka la dawa na ka National Highway Authority Of India (NHAI) ba ka dei ban siew shuwa ia ka bai lutksan sha baroh kito ki trai jaka bad trai iing ki ba hap hapoh u pud u sam jong ka Shnong, kiba ka NHAI ka dei shim jaka na ka bynta ban pynheh ia u NH 44, ha shuwa ban pyntrei noh ia ka surok Arliang, NH 44 ba dei  iaid lyngba ka Shnong Wapungskur.
“Ka Dorbar Shnong Wapungskur ka ieng ha ka nongrim kat kum ba ka la ia kren bad u Deputy Commissioner jong ka East Jaiñtia Hills District bad ruh bad ki Ophisar jong ka NHAI naduh duh ki por ba mynshuwa bad ruh na ka por sha ka por ba NHAI ka dei ban siew shuwa ia ka bai lutksan sha baroh ki nongshongshnong ki ba ka NHAI ka dei shim jaka bad pynpra iing na ka bynta ban pynheh ia utei u surok lym kumta ka Shnong kan ym ai lad satia ia ka ia ka NHAI ba kan pyntrei ia u tei u surok u ba dei iaid lyngbah u pud u sam jong ka Shnong” la ong u Bah Satly Ryngkhlem, Rangbah Shnong jong ka Shnong Wapungskur.
“Ka Dorbar Shnong Wapungskur ka pynpaw ia ka jingkmen ka ba khraw haduh katta katta ba ka NHAI ka la sdang ban pyntrei ia u tei u surok ha ki katto katne ki bynta jong u, hynrei  ka Dorbar Shong Wapungskur hi ka ieng beit ha la ka jong ka nongrim ba ia ka hok kaba ki paidbah nongshong shnong jong ka shnong pat kaba ki dei ban ioh, ka NHAI ka hap beit ban pynioh lada kumno kumno ruh khnang ba kan ym mih kano kano ka jingthut ha kaba pyntrei ia utei u surok da ka NHAI” pynkut ka kyrwoh khubor na u Bah Ryngkhlem.