Sieh MDC da ka kynthei ha ki ADC, ong ki saw seng

Shillong,
20 Rymphang:
Ka jingialang jong ka NPP, UDP, HSPDP bad ka KHNAM ka la ai jingmut ia ka sorkar jylla ba ka dei ban pdiang ban thung MDC shu sieh tang iwei da ka kynthei kaban phah da ki District Council.
Ha ka jingpynlait kyrwoh, kine ki seng sain pyrthei ki la pdiang ia ka jingpynbun ia ki MDC sha ka 40 ngut tangba dei ban thung MDC shu sieh tang iwei.
Ka jingialang jongki ka la rai ruh ba ka sorkar ka dei ban pyntreikam ia ka Tenth Schedule ne ka Ain Khang Kyntiap Seng ha ki District baroh.
Ka jingialang jongki, ka la iakren ruh ia ka jingsahteng ka Final Draft na ka tnad kam pohiing ka ri bad namar kane ka daw, kine ki seng kim lah ban ai ia ka jingmut kaba kut halor kane hynrei kin sa ai pat ha ka jingialang kaban sa khot biang da u Myntri Rangbah kumba la dep iakren kham mynshwa.
“Ngi kwah ban kren shai ba ka long kaba shisha ba ngi pdiang ia ka jingpyrshang jong phi ban wanrah ia ka suk ka sain ha GaroHills hynrei ngi la pan por kham bun ha ka jingialang kaba long mynshwa halor kane ka kam”, la ong ka shithi jong kine ki seng ba la phah sha u Myntri Rangbah ka jylla.
Ki la ong ba ki la ioh jingtip na u Commissioner  & Secretary ka tnad District Council Affairs ba ka tnad kampohiing ka ri kam pat phah ia ka Final Draft  halor ka kam pynbun MDC ha ki District Council.
“Namar ka jingthymbit ka por, ngi la phah ia kane ka jingai jingmut”, la ong ka kyrwoh kine ki seng ba la soi da u Dr. C R Lyngdoh ka NPP, u  Bah Witting Mawsor ka HSPDP, u Bah L  Lyngwa ka KHNAM bad u Bah A F Dkhar ka UDP.