Siat pathar ki pulit Assam, ia ki riew paidbah, iap 4ngut ha Mukroh

Mukroh: 4ngut ki riew paidbah, ki la shah siat iap mynta ka step, ha ki pulit Assam, ha ka shnong Mukroh, kaba hap ha Laskein Block, Jaintia Hills district.

Na ki lad khubor, la iathuh ba ki pulit Assam, ki leit rung sha katei ka shnong, da ka trok kit dieng bad kitei ki la kem naphang ia ki briew, kiba dang trei ha ki lyngkha jongki. Mar kumta, ki paidbah, kiba ia bna ia katei ka jingjia, ki la leit khang kdong ia katei ka trok, namar ba la shu kem khlem daw ia ki riew paidbah jong katei ka shnong.

Ka dei ha katei ka por, ba ki pulit Assam, ki la sei da ki tiar siat jongki bad ki siat naphang ia ki riew paidbah, kiba khang lynti ia katei ka trok kit dieng bad la iathuh ba kiba shah siat iap, ki kynthup ia U Si Dhar, na ka shnong Samaro, U Thad Shadap na Mukroh, U Six Talang na Barato bad U Tang Nartiang na Mukroh. Kiba mynsaw, ki long U Elias Samaiang (29) na Mukroh, U Sheini Nartiang (48) na Mukroh, bad U Chirup Sumer (40) na Mukroh.