Siat naphang ki shipai, iap da ki spah ngut mynta ka sngi ha Myanmar

Da ki spah ngut ki briew, ki la shu iap ei, mynta ka sngi, ha ka jing shah siat iap, ha ki shipai jong ka Myanmar.

Katei ka dei ha ka sngi ruh ba ki shipai Myanmar, ki rakhe ia ka Armed Forces Day.

Kitei kiba iap, ki dei na ki 40 tylli ki nongbah jong ka Myanmar, ong ka khubor. La iathuh ba ki shipai, ki siat naphang ia kito kiba iakhih pyrshah ha ki bynta bapher jong katei ka Ri, halor ka jing pyn jari, da ka synshar shipai.

Na ka liang jong kawei ka seng, ka CRPH, ka iathuh ba haduh mynta, ki la don 300ngut ki briew kiba la shah siat iap ha ki shipai naduh ba sdang kane ka synshar shipai ha Myanmar.

La iohi ruh ia uwei u khyllung, uba dang shisnem ka rta, uba shah siat na ki khmat jongu, ha ka Thamine jong ka nongbah Yangon, ha kaba la pyni paidbah ha ki social media. La iathuh ba utei u khyllung, ula shah siat katba u dang ialehkai ha phyllaw iing. Ym tang katta, ka la don sa kawei ka khynnah kaba dang 13 snem ka rta, kaba la shah siat iap ha Meikhtila mynta ka sngi jong ka Mandalay.