Siat ki suba GNLA ia 2 ngut ki Khasi ha Nongrathaw

Shillong, 10 Nohprah:
Uwei u rangbah Khasi u la kyllon iap ha ki kuli jong ki suba GNLA ha Nongrathaw kaba hap ha Shahlang police station ka ka West Khasi Hills katba uwei pat u mynsaw jur. Ki pulit ki la iathuh ba hynnin ka sngi kumba ha ka por 8:30 janmiet lai ngut dkhot ka GNLA ki la leit rung ha khyrdop jong u Bah Honsen Lyngdoh kaba don ha katei ka shnong ka thain Shahlang bad ki la siat iap ia u Bah Karly Nongsiej bad ia u Bah Harnessius Nongrum u la mynsaw na ka jingdei ki kuli.
U Bah Nongsiej u la iap hashen katba u bah Nongrum u la mynsaw namar ka jingdei ki kuli na bynta ka kti bad la pynkit sha hospital ban shah sumar.
U Bah Nongsiej uba khlad u dei u nong ap khyrdop ha katei ka jaka jong u Bah Honsen.
Mar ia dep leh ia kane ka kam, kine ki suba dkhot jong ka GNLA ki la her krad bak na katei ka jaka khlem iohi syrngiew shuh.
Ki pulit ki dang pynlong ia ka jingthwet kaba jur ban kem ia ki.